«Үш-Белдир» курортуң эрги оран-саваларында септелге ажылдары эгелээн. ТР-ниң кадык камгалал сайыды Анатолий Югай база «Серебрянка» санаторий-профилакторийниң кол эмчизи Оксана Гостюхина курорттуң септелге ажылдарының чорудуун хынап четкен.
Бо хүнде курортта тудуг материалдарын болгаш процедуралар эртер ванналардан эгелээш, чаа дериг-херекселди эккелген. Ол ышкаш кадыы кызыгаарлыг дыштаныкчыларны аэропорттан курорттуң баазазынга чедир аргыштырар микроавтобусту база ында эккелген.
Дыштанылга сезону эгелээринге чедир дыштаныкчыларга эмнениринге таарымчалыг байдалды тургузарын планнап турар.
«Үш-Белдир» курортун чаартыры чугула, ынчалза-даа транспорт чедери берге болгаш хөй чарыгдалдар үндүрери ажылды нарыыдадып турар дээрзин кадык камгалал сайыды демдеглээн. Ындыг турбуже бо чылын Тываның Баштыңы Владислав Ховалыгның деткимчези-биле республика бюджединден курортту чаартырынга акша-хөреңгини аңгылаан.
Эрткен чылын тудуг материалдары белеткээр пилораманы тургузарын кол эмчи Оксана Гостюхина организастаан. Бо хүнде ында 26 тудугжу ажылдап турар. Эрткен неделяда эргежок чугула чүъктү чедирери-биле вертолёт үш рейсти кылган.
Бистиң корр.
Чуруктарны ТР-ниң Кадык камгалал яамызындан алган.
“Шын” №20 2025 чылдың май 29
