Куспактар
«Сарыыл чок» деп сени бактаар хөңнүм чок бол,
Сагыжымны карартып кээр чаңгыс чүүл бар:
Чеже кижи өөрүшкүлүг чылыг куспаа
Сеңээ чаглак болуп чоржук, сактып көрем.
Демгилериң ында-хаая душчуп кээрге,
Дезиг бе дег, ойлап чоруур чадавас сен.
Чаның-биле кайы-бири эрте бээрге,
«Сагыжы бак аза» дээниң база магат.
Көвей чылдар «сүүзүннүг» эрткен-даа бол,
Хөөкүй бодуң чааскаанзырап чурттап чор сен.
Куу туман аразында шаараңнашкан
Куспактар-ла сени дилеп чорлар боор оң...
1990 чыл
Чагаа
Чанып келдим. Артып калдың.
Чарлып тура сөглеп кааным
Кым-даа билбес даңгыракты
Кызыл тын дег, камнап чор мен.
Чараш дүрзүң сагыжымда,
Чагааларың шыгжамырда.
Хөрлээ болган ынакшылың
Хөрек-чүрээм дамырында.
Өскен черим чечээнге-даа,
Өске кыстың куспаанга-даа,
Сарыым сени деңнепки дег,
Сакпай сеткил менде чок ийин.
1967 чыл
Чараш кыска
Чараш уруг сеңээ душкаш,
Салымым-даа болур-ла ыйнаан.
Өглүг-баштыг чораан сен дээш,
Өскүс чүрээм кемдетпейн көр.
Эрткен-барган чуртталгадан
Ында балыг таан көвей.
Эмнеттинмес чамдыктары
Ыы-сыыже шилчий берген...
Арыг-шынчы сээң чүрээң
Ындыг эвес болза-даа чок,
Аактыг чүрээм экиртип боор
Ылап эм-дом сенде дег-дир.
Ынчалза-даа күзелиңни
Дужап алыр хөңнүм чогул.
Ыржым частың боду ышкаш,
Тураң-биле чурттап-ла көр.
***
Башкы харны
Базарымга,
Хыйланган дег,
Кыйырай-дыр.
Думаалайлыг
Душтук кыс дег,
Чараш хадың,
Чанымда тур.
Чүге-ле ийик,
Чаңгыс сен дээн
Чүрээм күжүр
Чадаган-на...
1965 чыл
Херээженге ынак чордум
Эзиминге элик ышкаш,
Ээреминге балык ышкаш,
Херээженге ынак чордум,
Кедергей-ле ынак чордум.
Эзим черге өрт болган,
Элик күжүр дезе берген,
Ээремни шүүреп каапкан,
Эргим балык көзүлбестээн.
Чүгле мону бодап келгеш,
Чүрээм саргып ыстап үнер.
Херээженге ынак чордум,
Кедергей-ле ынак чордум.
Монгуш ДОРЖУ.
“Шын” №48 2025 чылдың декабрь 11