Доржу КАЗЫЛГАН
***
Сарыг бүрү тоглап баткаш,
Хөртүк-биле шугладыпкан.
Хамык бойдус дирлип турда,
Сарыг бүрү катап үнмес.
Бузундулар чыып ойнап,
Чыглып алгаш, сайзанактаар
Чашкы үем сактып кээрге,
Дыштыг болгаш өлчейлиг-дир.
Бичии чораан үелерни
Бодап, сактып бижизимзе,
Бүдүн ном-даа, тоожу-даа
Бодараза хөңнү-ле боор.
Чааскаан оргаш, чалгаараанда,
Чуруктарым тудуп аар мен,
Чаңгыс класска өзүп келген
Чажыттарым көстүп кээрлер.
Шак ол өйде сактыышкыннар
Шагжаң хөрээм иштин өйүп,
Дүвүлендир хадып келгеш,
Дүвүредип хөлзеди бээр.
Тоглап баткан бүрүлер дег,
Эрткен үем эглип келбес.
Эвээш-даа бол, эрткен үем
Энерелдиг чүрээм утпас.
***
Боттарынга дөмейлешкек дүннер, хүннер,
Сүрүшкен дег, караңайнып эртип-ле тур.
Багай бодум шаам-биле шырбайып-ла,
Салым-хуумну шуудадып чоруур-дур мен.
Кады кырыыр ынак эжим чанымда,
Чаптанчыгбай уругларым бар-ла-дыр.
Чүреккейге ынчалза-даа кажан-даа,
Хензиг-даа бол, оожургал турбас-тыр.
Бодалдарым, чажыттарым кезээде
Бодум шыгжап хинчектенип чору мен.
Чамдыкта мен шыдавайн ыглапкаш,
Чүгээртенип, улуг тынып келир мен.
Хүн-даа эртип, дүн-даа дүжер —
Дүвүренчиг дүштер үглээр,
Дыш-даа чокка аңдаштанып,
Карак шиммейн чыдар-дыр мен.
Хары кижээ сеткил сөглээр эпчок болгай,
Чоок кижи сагыш аарып туруп бергей.
Халааданчыын, канчаар мен ам?
Чымчак сыртык база катап өңнүүм боор бе?