Чырыш дигеш, эстип чидер
Сырылаан от – кызаңнааш дег,
Сырынналган сеткил өөртүр
Чылда чаңгыс келир час дег,
Чаңгыс душкаш, чана бердиң.
Сагыш аарып,
Чааскаан артым.
Хуу-салым кызыл тыны –
Куъдум чайып аппарган дег,
Карак чивеш аразында
Каткан чүрээм шыгыткан дег,
Соондан сүрер
Сорук-күзел,
Чүткүл мени
Чүглендирген.
Оожум чораан сеткилимни
Орталатпастап дүвүредир
Угаанымга чагыртпас күш –
Улуг ынакшыл келгенинден
Ынак эштиг,
Ырлап чурттаар,
Аксым кежиин
Ам-на тыптым.
***
Уяранчыг ырлаарыңга,
Улус шупту тынар-тынмас,
Улуг тынып, шимчеш дивейн боданы бээр,
Аялганың аайы-биле ужуккан дег,
Кандыг-ла-бир тоолзуг черде
Кадыг чоруп турган дег боор.
Уяранчыг ырлаарыңга,
Улаан шуурган аяскан дег,
Өрү дээрден херел чажып саарылганзыг,
Өгнүң ишти чырып, чылып келген ышкаш,
Аялганы таалап дыңнаан
Аал ишти ыржым апаар.
Уяранчыг ырлаарыңга,
Эжи читкен ол-ла черге
Үш чыл улай ыглап келир аңгыр ышкаш,
Эрткен үем – бүтпейн барган ынакшылдың
Үүлези – аарышкызы
Эглип келген ышкаш болур.
Уяранчыг ырлаарыңга,
Удуй албас апаар болгаш,
Куу күзүн ээн черге олурган дег,
Куюм чүрээм овурлап чыып, хөлзей бээрге,
Бодалдарым шимчээшкини
Олуртпастап дойлуп үнер.
Саая МАЙНАК,
Тываның чогаалчылар эвилелиниң кежигүнү.
Чурукту интернеттен алган: chukovka17.ru/item/1181807
“Шын” №45 2025 чылдың ноябрь 20