Тывам оглу
Докулчак ак өөн тиккеш,
Тос-ла чүзүн малын малдаан,
Ужур-чаңчыл уттуп кагбас
Уктуг малчын Тывам оглу.
Эр бооп өзүп доруккаш-ла,
Эзеңгиден халбактаныр,
Октаан сыдым черге дээспес
Орлан-шоваа Тывам оглу.
Чүстүг сиген сыя баспас
Чүгүрүктү муна каапкаш,
Хөөмейлеп чортуп чоруур
Хөңнү биче Тывам оглу.
Сыгыр октуун шыгаап аткаш,
Сырбык караан черле часпас,
Ханныг дошкун демиселге
Хая көрбес Тывам оглу.
Кара-баарлап шанчар, тевер,
Катай каккаш дүжүргүлээр,
Адаанныгга алзып өлбес
Арзылаң дег Тывам оглу.
Буян ЕНДАН.
Тывызыксыг чүве чок-тур
Өгбелерден дамчып келген
Өртээ турбас ыдыывысты –
Боостааның эртинезин
Бойдузувус чаяап берген.
Сыгыдывыс, хөөмейивис
Сыннар сиртин дээскинип,
Черниң, дээрниң аразынга
Челээш тыртып, сырынналыр.
Эмнээр-домнаар сорунзазы
Эътте, сөөкте сиңип калган.
Сүлдевисти бедидип кээр,
Чүглүг куш дег ужудуптар.
Хөй-ле чоннар делегейде
Хөөмейивис шинчилеп тур.
Тыва эрниң сыгыды дег
Тывызыксыг чүве чок-тур...
Тараа ОССУР,
күш-ажылдың хоочуну.
Тээли суур.
Хары чер
Хатчыл, чаъстыг, агаар-бойдус шала «доңгун»,
Хары чер деп ѳскелээним чазыг болду.
Суургалары ѳндүр бедик Москва хоорай
Судакталган намдарывыс арттырып каан:
Күске чылдың ѳѳрүшкүзү, ыдык белээ –
Күзеп манаан хензиг тѳлүм бодараттым.
Эртем-билиг оруун сураан тыва кижээ
Эжиктериң харам чокка ажыттың-даа.
Каш-ла чылдың нүүрүнде ижиктирдиң,
Кадыг-бергээ каңнап бердиң, улуг хоорай.
Хары чер деп ѳскелээним чазыг болду –
Харын эң чоок, төрел черим болу бердиң.
Чаяна ШИЛОВА.
"Шын" №63, август 26, 2023 чыл.