Хүндүлүг «Шын» солуннуң ажылдакчылары, хоочуннары болгаш номчукчулары!
Солуннуң 100 чыл ою-биле силерге ТР-ниң Дээди Хуралының (парламентизиниң) депутаттарының мурнундан байыр чедирерин чөпшээреп көрүңер!
«Шын» солун амыр эвес узун орукту эртип чоруур. Чүс чылдың иштинде республика, ооң иштинде тыва культура болгаш тыва дыл, дыка сайзыраан. Солунда экономика, өөредилге, культура, спорт, мөзү-шынар темаларынга айтырыглар хөйү-биле чырыттынып турар. Үндезин тыва чон ортузунга бо бүгү эки чүүлдерниң могаг-шылаг чок тарадыкчызы, суртаалчызы– «Шын» солун. Ол Тываның хөгжүлдезиниң алдын үезин республиказы-биле кады чурттап эрткен: муң-муң солун чүүлдерни тыва парлалгага, а ынчап кээрге, төөгүге кадагалап арттырган.
Солунувус – тыва кижиниң сагыш-сеткилиниң көрүнчүү. Номчукчулар боттарының чедиишкиннерин, өөрүшкүлерин, амы-хууда бодалдарын, четпес дудуу талаларын ынак солунунга чырыдып чоруур. Ону «чоннуң индири» деп турганында утка бар. Чүс чыл дургузунда солуннуң күжү кызыгаар чок турган.
Редакцияга Тываның дээре дээн журналистери болгаш чогаалчылары аңгы-аңгы чылдарда ажылдап чораан. Ол хөй кижини журналистиканың, уран чогаалдың, эртем-шинчилелдиң улуг оруунче үдээн.
«Шын» солун тыва дылды кадагалап арттырарынга, ону сайзырадырынга канчаар-даа аажок улуг рольду ойнап чоруур. Ооң ачызында ава дылывыска янзы-бүрү чүүлдерни номчуп чоруур аргалыг бис. Солун өртемчейже бистиң көрүүшкүнүвүстү, төрээн черивиске ынакшылывысты быжыглап хевирлээн.
Бо юбилейлиг хүнде «Шын» солунга ажылдап чораан болгаш ажылдап чоруур бүгү кижилерге: журналистерге, редакторларга, корректорларга, парлакчыларга, фотографтарга, чолаачыларга өөрүп четтиргенивисти илередиили. Оларның кызымак ажылының түңнелинде «Шын» солун чүс чылдың дургузунда чоннуң ынак солуну болуп арткан.
Төөгүлүг хоочун солунувуска, ооң амгы ажылдакчыларынга, хоочуннарынга чаа-чаа чогаадыкчы чедиишкиннерни, солун болгаш чугула материалдарны күзеп тур бис. «Шын» солун моон-даа соңгаар тыва дылдыг номчукчунуң шынчы өңнүү болгаш сүмелекчизи болуп артар болзун!
Юбилейиңер-биле, «Шын» солунувус!
ТР-ниң Дээди Хуралының (парламентизиниң) Даргазы К. ДАВАА.
2025 чылдың август 28 “Шын” №33