Шрифт
А А А
Фон
Ц Ц Ц Ц Ц
Изображения
Озвучка выделенного текста
Настройки
Обычная версия
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы
(видео, карты и т.д.)
Вернуть настройки по умолчанию
Настройки Обычная версия
Шрифт
А А А
Фон
Ц Ц Ц Ц Ц
Изображения
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы (видео, карты и т.д.)
Вернуть настройки по умолчанию

Шагаа бүдүүзүнде улуг концерт

16 января 2024
13

Чаа чылдың эгезинде республиканың аңгы-аңгы адыр бүрүзүнде албан черлери эрткен чылдың ажылын түңнеп, чаа чылда бурунгаар сорулгаларын салып турар. Тываның улусчу чогаадылгазының шыырак дээн бөлүктери 2023 чылды түңнээри-биле, Улусчу чогаадылга бажыңынга болур улуг концертке белеткенип турар.

Республиканың бот-тывынгыр чогаадыкчы коллективтери эрткен чылда кылган ажылын болгаш чедиишкиннерин көрүкчүлер-биле мындыг хевирлиг үлежири чаңчыл апарган. Олар-биле сырый ажылдап турар Республиканың улусчу чогаадылга болгаш дыштанылга төвү ийи чыл бурунгаар чогаадыкчы коллективтерни чыл эгезинде чаңгыс сценага чыып, эрте берген чылда чедиишкинниг болган бөлүктерниң киржилгези-биле улуг концертти чонга бараалгадыр деп шиитпирлеп алган турган.

«Тыва салым-чаяанныглар-биле алдаржып турар» деп шоу-концерт ийи дугаар болуп эртери бо. Бо удаада аңаа он ажыг чогаадыкчы коллективтер болгаш уран чүүл бөлүктериниң төлээлери, ниитизи-биле 120 хире салым-чаяанныглар киржип келир. Олар шупту 2023 чылда Делегей болгаш Бүгү-российжи чергелиг, оон аңгыда, регионнар аразынга болуп эртип турган фестивальдар, мөөрейлерниң тиилекчилери.

Чижээлээрге, Эрзин кожуундан улусчу фольклор бөлүү «Эзир-Уя» эрткен чылын «Культура» национал төлевилел-биле эртип турар бот-тывынгыр чогаадыкчы коллективтерниң Бүгү-российжи фестиваль-мөөрейинге лауреат ат чедип, 2 сая рубль түңнүг грантыны алган. 2023 чылда делегей чергелиг фестиваль болгаш мөөрейлерниң аңгы-аңгы жанрларга тиилекчилер болган бөлүктерге Кызыл кожуундан улусчу ыры ансамбли «Аян тудаал», Чеди-Хөл кожуундан үлегерлиг театр коллективи «Эдельвейс», Ак-Довурактың «Онзагай» бөлүүнден Амина Монгуш, Чечен-оол Оюн, мода болгаш костюм театрлары «Чинчилиг» (Эрзин), «Он-Кум» (Шагаан- Арыг), «Бадма» (Ак-Довурак), «Баян-Дугай» (Чадаана) хамааржыр.

Оон аңгыда, Бүгү-российжи фестивальдарга бедик шаңналдар алган Бии-Хем кожуундан үлегерлиг сам бөлүү «Аржаан», Кызылдың орус ыры ансамбли «Раздолье» база концертке оюн-көргүзүүн бараалгадыр.

Улусчу чогаадылга бажыңынга болур концертке эрткен чылда бедик чедиишкиннерлиг болган бөлүктерге Тываның Культура яамызы тускай акша шаңналдарын база тыпсыр. Республиканың улусчу чогаадылгазының тергиин салым-чаяанныгларының концерти Шагаа бүдүүзүнде, Бүдүү айында эң-не чараш, солун болгаш көрүштүг хемчег болуру магатчок. Чаа үнген чылда культура хемчеглерин көөрү-биле күрүнениң үндүрүп берген беш муң акшазы Пушкин карталарынче киргенин барымдаалааш, ук программаның киржикчилеринге хамааржыр 14-тен 22 харга чедир аныяктарны улуг концертче Улусчу чогаадылга болгаш дыштанылга төвү чалап тур.

Виктория АЙМАА, Республиканың улусчу чогаадылга болгаш дыштанылга төвүнүң килдис даргазы.