Февраль 1-де Тывадан ээлчеглиг ачы-дуза чедирилгезин Шагаа уткуштур республиканың чону тускай шериг операциязында киржип турар оолдарже чыып чоруткан. Ол ачы-дуза чүъгү дайынчыларда чеде бергениниң дугайында ТР-ниң Чазак Даргазы Владислав Ховалыгның оралакчызы Тимур Куулар ВКонтакте-де бодунуң арнынга мынчаар бижээн:
“Ам каш-ла хонгаш, делегейниң аңгы-аңгы булуңнарында бистиң чаңгыс чер чурттугларывыс шаг чаазы – ыдыктыг Шагаавысты байырлаар. Тускай шериг операциязында киржип турар тыва дайынчыларывыс база оон чыдып калбас. Ынчангаш бис катап база оларда чедип келдивис.
Бистиң шуптувуска эң-не кол байырлалывыс уткуштур тыва дайынчыларга кээри – бичии эки чаңчылывыс апарган деп чугаалап болур. Тывавыстың бүгү чонунуң чыгган ачы-дузазын: транспорт техниказын, аъш-чем болгаш өске-даа чүүлдерни онча-менди эккеп бергенивиске өөрүп тур мен. Чүге дээрге бистиң оолдар бо бүгүнү көргеш, быжыг болгаш бүзүрелдиг тыл бар деп билип турар!
Эң-не кол чүүл – шак мындыг сургакчылаашкын үезинде бистиң шериг оолдарның чагыын, дилээн дыңнап билип алыры. Бир дугаарында, оларның чанып кээрин четтикпейн манап турар боттарының өг-бүлелеринге эки медээлерни дамчыдарын дилеп турарлар. Дайынчыларывыстың ол болгаш өске-даа дилеглерин ыяап-ла күүседип, дузалап турар бис.
Бо хүнде дайынчы даалгаларын күүсеткеш, кезээнде чедип келген оолдарның ховар болур дыштаныр минуталарында бистиң хөөмейжилеривис оларны уткуп алгаш, төрээн чуртундан дыңнаксанчыг национал ыр-шоору болгаш хөөмей-сыгыдын бараалгадып бергеннер. Шак ындыг минуталарда экер-эрес дайынчыларывыс чүрээ-биле, сагыш-сеткили-биле өскен-төрээн черлери – тайга-таңдызы, ховуларынче, хемнер, хөлдеринче эглип, оожургалды алырлар...”– деп, Тимур Борисович бижээн.
К. МОНГУШ.
Чуруктарны интернеттен алган
“Шын” №10 2024 чылдың февраль 10
