Көдээ ажыл-агый яамызы ТШО-нуң дайынчыларынга Шагаа байырлалын уткуштур республиканың кожууннарындан ачы-дуза чедирери-биле эът чыыр ажылды организастап чорудуп турар. Амгы үеде Бии-Хем кожуундан Андрей Шагдыр аът эъдин, Бай-Тайганың кожуун чагыргазы 100 ажыг кил хой эъдин, Кызыл кожуун 8 хой, 3 инек эъдин, Барыын-Хемчикте уксаажыдылга бүдүрүлгезиниң даргазы Орлан Тараачынович 2 сарлык эъдин эккеп дужааган. Ниитизи-биле 700 ажыг кг эътти чыып алган. Ук ачы-дуза чедирилгезин январь 31-ге чедир чыггаш, февраль 1-де чорудар.
“Ооң мурнунда малдың коң эъдин бүдүнге чорудуп турган болза, дайынчы оолдарывыска кылып чииринге белен кылдыр тускай доң эът кезер херексел-биле бичииледир кескеш, хаптааш, чорудар бис. Бир хапка-ла аът, хой, сарлык эъди турар” – деп, Көдээ ажыл-агый яамызының мал ажыл-агыйын харыылаар килдизиниң кол специализи Чодураа Иргит чугаалаан. Кожууннарда малчыннар даштын чеже-даа -45 градус болза, чаңгыс чер чурттугларынга дуза чедирери-биле эъдин белеткеп турарлар.
Кызыл кожуун база республиканың өске-даа кожууннары дег ТШО эгезинден тура дайынчыларга машина болгаш оон-даа өске чугула херек чүүлдер-биле дузалап келген. “Төрээн чер-чуртундан эът-чемни алгаш, ол-даа болза Шагаа байырлалында сагыш-сеткили көдүрлүүшкүннүг болзун дээш бо ачы-дуза чыылдазын чорудуп турар бис” – деп, Кызыл кожууннуң чагырыкчызының хүлээлгезин күүседип турар Белек Уйнукай чугаалаан.
Бүгү-российжи улусчу фронтунуң ТР-де салбырының удуртукчузу Саима Далчин чурттакчы чонну дайынчы чаңгыс чер чурттугларывыска Шагаа уткуштур ачы-дуза чедиреринче кыйгырган: “Ниитизи-биле 3 тонна эътти чыырын планнап турар бис. Шагаа мурнунда гуманитарлыг дуза чедирери-биле, 10-даа тонна эът сыңа бээр 2 улуг машина чоруур. Ынчангаш чурттакчы чонну январь 31-ге чедир Шагааның акциязынга киржип келирин кыйгырдым. Эътти оң талакы эриктерде Правобережный 4 дугаар оран-савада көдээ ажыл-агый рыногунда хүлээп турар”.
Чыжыргана СААЯ.
«Шын» №6 2024 чылдың январь 27
