2026 чылдың бирги чартыында Шагаан-Арыг хоорайга чаа одалга төвү тудуп эгелээр. Тываның Баштыңы Владислав Ховалыг ооң дугайында бодунуң албан ёзузунуң телеграм-каналында дыңнаткан. Чоокта чаа регионнуң удуртукчузу чогуур яамылар болгаш ведомстволар төлээлери-биле ажылчын хуралды эрттиргеш, республиканың кол энергетика төлевилелдерин сайгарып көрген. Ылаңгыя Шагаан-Арыг биле Ак-Довурак хоорайларга чаа котельнаялар тударының айтырыгларын чугаалашкан.
Ак-Довурактың котельная төлевилелинге херек бүгү техниктиг документилерни бо чылын белеткээрин Владислав Ховалыг чугаалаан. Шагаан-Арыгның объектизинде тудуг ажылдары ам эгелээр. «Объект бүрүзүнге тодаргай «орук картазын» тургузар. Бо айтырыглар энергетика хөгжүлдезиниң талазы-биле улуг хемчээлдиг ажылывыстың бир кезээ болурун чоокта чаа Дээди Хуралга Айыткалымда демдеглээн мен» — деп, Тываның Баштыңы демдеглээн. Ол төлевилелдерни боттандырыптар болза, регионнуң үр хуусаалыг социал-экономиктиг хөгжүлдезинге херек ынаныштыг энергетика инфраструктуразы тургустунарынга бүзүрелин база илереткен.
Шагаан-Арыг биле Ак-Довурак хоорайларга чаа котельнаялар тудар планнар 2030 чылга чедир республиканың комплекстиг коммуналдыг эде чаартылга программазында кирген. Регионнуң Одалга болгаш энергетика яамызы амгы үениң дериг-херекселдерин болгаш материалдарын ажыглап тургаш, чылыг хандырылга объектилериниң төлевилелдери боттанырын демдеглээн. Депшилгелиг технологияларны кииргени чылыг энергиязын бүдүрер чарыгдалдарны элээн эвээжедип, чурттакчыларга шынарлыг болгаш бүзүрелдиг чылыг болгаш изиг суг хандырылгазын магадылаар.
«Амыдыралга инфраструктура» национал төлевилелдиң «Коммунал инфраструктураның эде чаартылгазы» федералдыг төлевилели-биле котельнаяны тудар. ТР-ниң Чазаа биле РФ-тиң Тудуг болгаш чуртталга-коммунал ажыл-агый яамызының аразында федералдыг бюджеттен субсидия бээриниң дугайында дугуржулга чардынган. Эрткен чылдың июль төнчүзүнде Шагаан-Арыг котельнаязының төлевилел-смета документациязын бүрүнү-биле ажылдап кылган, а август айда күрүне экспертизазының чогуур үнелелин алган. Бо чылдың бирги кварталында энергетика объектизин тударынга тендерни чарлаар.
2024 чылдың март айда хей-доозун холумактыг частыышкын болган Шагаан-Арыг ЧЭТ-инге чаа котельнаяны тудар дээн Тываның Баштыңының саналын Россияның Президентизи Владимир Путин регионга ажыл-агыйжы чорук үезинде деткээнин демдеглезе чогуур. Күрүне баштыңы Тыва Республиканың дилээн сайгарып, деткиирин Россия Федерациязының Чазааның Даргазының оралакчызы Марат Хуснуллинге дааскан.
Бистиң корр.
Чурукту интернеттен хоолгалаан.
“Шын” №5 2026 чылдың февраль 12
