Тываның Экономиктиг сайзырал болгаш үлетпүр яамызының дыңнатканы-биле алырга, «Көдээ девискээрлерниң комплекстиг хөгжүлдези» күрүне программазы-биле Шагаан-Арыг хоорайга хөй ажыглалдыг спорт залының тудуу 2026 чылда эгелээр. Россияның Көдээ ажыл-агый яамызы-биле Тыва Республиканың Чазааның аразында чарган федералдыг субсидиялар бээриниң дугайында дугуржулга ёзугаар спорт залдың тудуу 2027 чылдың төнчүзүнде доостур ужурлуг.
2024 чылда-ла Тываның Экономиктиг сайзырал яамызы биле Улуг-Хем кожуун чагыргазы «Көдээ девискээрлерниң комплекстиг хөгжүлдези» күрүне программазының хемчеглерин, ооң иштинде Шагаан-Арыгга хөй ажыглалдыг спорт шөлүн тудар төлевилелди боттандырар дугайында чагыгны киирген турган. Россияның Көдээ ажыл-агый яамызының 2026-2027 чылдарда акшаландырар кылдыр деткээни чагыглар санында төлевилелдиң киргени ол-ла чылдың ноябрьда-ла билдине берген.
Амгы үеде төлевилелдиң чагыкчызы болур Улуг-Хем кожуун чагыргазы муниципалдыг садып алыышкынны эрттирери-биле документилерни белеткеп эгелээн. Бо хүнде спортчу объектини тудар чер участогу тодараттынган – Олимпийская кудумчузунуң 2 дугаар бажыңынга. Төлевилелдиң күүселдезинче 230 сая ажыг рубльди тускайлаары көрдүнген.
Амгы үеде Шагаан-Арыг хоорайда «Көдээ девискээрлерниң комплекстиг хөгжүлдези» күрүне программазы-биле социал ужур-уткалыг объектилерни эде чаартыр болгаш тудар элээн каш төлевилелдер боттанып турарын сагындыраал.
Чыл эгезинден 1 дугаар школаның улуг септелгези база Малчын кудумчузунда суг шугумунуң тудуу эгелээн. Объектилерде ажылдың чорудуун доктаамал хайгаарап турар Экономиктиг сайзырал яамызының дыңнатканы-биле алырга, ноябрь төнчүзүнге чедир тудуг ажылдары график ёзугаар чоруп турар. 1 дугаар школада ажылдарның 95 хуузу доозулган. Школаны долгандыр эрги херимнерни адырып, чаа херимни салган, шалаларны куткан, будуур ажылдар доозулган. Азар дээвиирлерни эптеп эгелээн.
Суг шугумун тударында улуг чедиишкиннер бар. Малчын кудумчузунда суг дамчыдар шугумнуң 3,4 километрде кол кезээ шөйдүнген. 46 кудукту база өрт өжүрер 16 суг хоорзаларын эптээн. Чугула чүүл – Чээнек, Эйлиг-Хемская, Интернациональная кудумчуларын дургаар суг шугумунуң чаа участогун тудар дээш, төлевилелди калбарткан. Бо немелде участокка чеди кудукту, 5 суг насостарын болгаш үш өрт гидрантызын салыр.
Экономиктиг сайзырал яамызы ол төлевилелдерниң күүселдези кожууннуң хөгжүлдезинге стратегтиг ужур-дузалыг болурун демдеглээн. Чаарттынган школа хоорайның ажы-төлүнге бедик шынарлыг, амгы үениң өөредилгезин чедип алыр арганы бээр. Ооң-биле чергелештир чаа суг шугуму чурттакчыларның амыдырал-чуртталгазының шынарын элээн экижидер.
Хоорайга хөй талалыг спорт шөлүнүң тудуу аңгы-аңгы назы-хар аайы-биле спортчу секцияларны ажыдарынга база спортчу хемчеглерни эрттиреринге байдалдарны тургузар, бирги ээлчегде хамаатыларның кадыын быжыглаарынга болгаш чурттакчы чоннуң ортузунга кадык амыдыралды нептередиринге идигни бээр.
А. МОНГУШ.
Чурукту ТР-ниң Чазааның парлалга албанындан алган.
“Шын” №48 2025 чылдың декабрь 11