Февраль 24-те "Херел" спорт өргээзинге 4 аңгы назы-хар аайы-биле хоочун мөгелер база студентилер аразынга Шагааның ак айында база Ада-чурт камгалакчыларының хүнү таварыштыр тыва хүреш маргылдаазы болган. Ону Кызыл хоорайның чагыргазы база Тыва национал хүреш федерациязы организастап эрттирген.
45–50 назы-хар аразында мөгелер аразынга Хартыга мөге Альберт Комбуй-оол (Өвүр) шүүлген, кожуун чергелиг Начын мөге Орлан Монгуш үжүүрлешкен, 3-кү, 4-кү шаңналдыг черлерни Хартыга мөге Опанас Семис-оол база Начын мөге Омак Кара-Сал (үжелээ Чөөн-Хемчиктен) олар алганнар.
51-ден 55 харлыг мөгелер аразынга Геннадий Монгуш (Кызыл кожуун) шүүлген, Хеймер Монгуш (Барыын-Хемчик кожуун) үжүүрлешкен, 3-кү шаңналдыг черге Аяс Хертек (Бай-Тайга кожуун) келген.
56–60 харлыг мөгелер аразынга Арзылаң мөге Чимит Куулар (Өвүр) шүүлген, Саңгак-оол Ооржак (Улуг-Хем кожуун) үжүүрлешкен, 3-кү, 4-кү шаңналдыг черлерде Михаил Оюн (Таңды кожуун) база Артур Дамдын (Эрзин кожуун).
61-ден өрү назы-харлыг мөгелер аразынга Арзылаң мөге Владимир Монгуш шүүлген, Федор Куулар (Кызыл кожуун) үжүүрлешкен, 3-кү, 4-кү шаңналдыг черлерде Андрей Биче-оол (Улуг-Хем кожуун) база Виталий Ооржак (Чөөн-Хемчик кожуун). Хоочун мөгелеривис аныяк-өскенге үлегер-чижек көргүзүп чорууру дээш өөрүп четтирип, изиг байырывысты чедирдивис.
Сургуулдар аразынга кожуун чергелиг Арзылаң мөге Аяс Монгуш шүүлген, Болат Буянды үжүүрлешкен, 3-кү, 4-кү шаңналдыг черлерге Александр Доржу (Улуг-Хем) база Ай-Хаан Делгер-оол тергиидээн.
Алексей Чамбал-оол.
Чуруктарны интернеттен алган.
“Шын” №15 2024 чылдың февраль 28
