Элээн каш чылдарның дургузунда Чөөн-Хемчик кожууннуң Шеми сумузунуң төп-биле аргыжылгазы нарын болуп артпышаан турган. 2025 чылда чидиг айтырыг шиитпирлеттинип эгелээни шемижилерни өөрткен. Сумуже кирер оруктуң асфальтылаашкыны база эгелей берген. Элээн каш километрни эрткен чылда чадыпкан, үнүп келген чылда ажыл уламчылаар.
Бо дыштаныр хүннерде Шеми хемни кежир узуну 15 метр, калбаа 9 метр көвүрүгнүң капитал септелгезин дооскаш, байырлыг байдалга ажыткан.
Чөөн-Хемчик кожууннуң болгаш суму чагыргалары шудургу ажылдаан тудугжулар Айдыс-оол Ондарны, Шолбан Ондарны,
Буян Монгушту, Аңчы Кууларны, болгаш Соруктуг Монгушту шаңнап-мактаан.
Медээни болгаш чуруктарны Чөөн-Хемчик кожуун чагыргазының арнындан алган.
