Чаа чылдың эң сураглыг ылгавыр демдээ – каастап каан шивижигеш, адап чаңчыкканывыс-биле ёлка. Кылымал шивижигештерни улус чылдары-биле шыгжап, ону каастаар кылагар ойнаарактарын чылдан чылче чаартып кел чыдар болур. Сөөлгү 5 чылда Чаа чылдың каасталгазын албан черлеринге, бажыңнарга чаңгыс өң-биле кылыры нептереңгей апарган. Чүгле алдын азы мөңгүн чайырлыг ойнаарактар-биле азы чүгле көк, чүгле ногаан өңнер-биле каастап алырга, көрүштүг апарган. Кандыг чыл үнүп олурарыл, ол чылга хамаарышкан өңнерни шилип турары чажыт эвес.
От олуттуг кызыл Аът чылын уткуур Чаа чылда бажыңнарга болгаш албан черлеринге шивижигешти кызыл, сарыг-кызыл, алдын-сарыг өңнер-биле каастаарын специалистер сүмелеп турар. Шивижигештиң ойнаарактары чүгле кызыл болур болза, адаанга салыр белектер хааржакчыгаштары база кызыл өңнүг болгаш алдын кожаалар-биле дериттинген болуру күзенчиг. Кызыл өңнүг калбак атлас кожаадан бантиктерни кылгылап алгаш, шивиниң будуктарынга чыпшырып ап болур. Совет үеден тура эдилеп келген янзы-бүрү өңнүг чараш ойнаарактарны түр када кызыл кылдыр кылып ап болур. Кылаңайнып турар кызыл өңнүг люрекс, фатин дээн чижектиг шөйлүп турар капрон пөстен садып алгаш, өске өңнүг ойнаарактарны ораап ап болур. Быжыг болзун дээш чиңге кызыл азы алдын кожаа-биле боой баглаптар. Мишуралар база кызыл азы алдын болурга, улам чараш.
“Шын” №50 2025 чылдың декабрь 25