Улуг-Хемниң Арыскан сумузунга Чаа чыл бүдүүзүнде мындыг аттыг мөөрейни агитбажыңнар болгаш албан черлериниң аразынга чарлаан турган.
Мөөрейниң кол сорулгазы — арга-арыгда шивилерни диригге арттырып алыры болгаш киржикчилерниң тывынгыр-сагынгырын, үрде ажыглаттынып, чыл санында делгеп алыр кылдыр быжыг база ажыглалче кирбейн барган материалдар-биле шивижигештиң овур-хевирин дүрзүлеп кылгаш, чогаадыкчы мөөрейге бараалгадыры. Мөөрей төп Шивижигештиң девискээрин каас-шиник киирип, байырлыг хөөннү оттуруп, улус-чонну мөөңнеп, найыралдыг демниг чоруун көргүскен. Өзүп олурар бичии чаштарывыска үлегер-чижек, камналгалыг, хумагалыг чорукту тургузуп, чараш чүүлдерже сонуургалын оттурган. Шивижигештерни ыяштан, колла саваларындан, пластмасс стаканнардан, доштан, кылагар пөстен дээш чогаатканы онзагай.
Мөөрейниң түңнелинде дараазында агитбажыңнар тергиидээн:
1 черде — «Кара-Суг» командазы (Гагарина кудумчузунуң бажы);
2 черде — «Хүнчүгеш» командазы (Мира кудумчузунуң адаа);
3-кү черде — «Чыжыргана» (суур адаа) биле «Чодураа» (Титова кудумчузу) агитквартиралары үлежип алганнар.
Албан черлеринден: 1-ги черни школа, 2-гизин уруглар сады, 3-кү черни сумунуң Адалар чөвүлели алган.
Мөөрейни Э.В. Донгак, А.И. Савыр база сумунуң хууда сайгарлыкчылары С-С.И. Даваакай, А.К. Калдар-оол деткикчилеп, белектерни тывыскан. Арыскан сумузунуң баштаар чери деткикчилерге Чаа чыл таварыштыр байырын чедирип, өөрүп четтиргенин илереткен.
Арга-арыг — бистиң хем-сугларывыс, агаарывыс арыглап турар, ынчангаш хумагалаары-биле өзүп олурар шивижигештерни камнап, бир-ле чүүл-биле чогаадып ап болур дээрзин мөөрей дузазы-биле чонувуска үлегер кылдыр көргүстүвүс.
«Улуг-Хем» солуннуң медээзи болгаш чуруктары.
