Улусчу фронтунуң «Шупту чүүлдү тиилелгеже» деп федералдыг төлевилелиниң иштинде ачы-буян концерттерин Тывада организастап турар. Тускай шериг операциязында киржип турар шериглерге деткимче көргүзер сорулгалыг ачы-буян концерттерин үш дугаар эрттирип турары бо.
Улусчу чогаадылга бажыңынга болган концертке Тыва эстраданың сылдыстары оюн-көргүзүүн бараалгаткан. «ТШО хоочуннарының ассоциациязы» хөй-ниити организацияның даргазы Тагба Мөнге база ук концертти көрүп келген. «Шак-ла мындыг концерттерни ай санында эрттирип турар болза эки деп бодаар мен. Ачы-буян концерттеринден аңгыда, бөдүүн чон болгаш ТШО-га киржип чораан дайынчылар база деткимчелерни көргүзүп турар дээрге-ле чонувустуң демниин, буянныын бадыткап турар-дыр» — деп, ол чугаалады.
Сценага сураглыг ыраажылар, самчылардан аңгыда, ТР-ниң гимнастика федерациязының өөреникчилериниң чараш оюн-көргүзүүн көрүкчүлер улуг чоргаарал-биле хүлээп көрген. Федерацияның президентизи, ТР-ниң күш-культуразының болгаш спорттуң тергиини Алёна Удод концертке киржилгезиниң дугайында тайылбырлады: «Бөгүн бо концертке «Ангелдерниң аллеязы» биле «Чараш Тыва» деп ийи көргүзүглүг мергежилгелерни көргүстүвүс. «Ангелдер аллеязында» 6–7 харлыг бичии кыстар биле улуг уруглар киржип турар. Бо көргүзүүвүстү Донбасска мөчээн уругларга тураскаадып тургускан бис. Бичии уруглар шын-на сеткили-биле күүсеттилер. Сеткил-сагыш хайныышкынындан көрүкчүлер карактарының чажын тудуп шыдавайн турдулар. Бичии уруглар безин өске кижилерниң качыгдалын чоок хүлээп турар.
Өөреникчилеривис аразында чамдык уругларның ачалары ТШО киржикчилери. Ынчангаш кым-даа, ылаңгыя бичии уруглар, төрээн чурт, хүлээлге, ажыг-шүжүг, буянныг чорук деп чүүлдерни билип турар».
Тыва Республиканың профэвилелдер федерациязының даргазы Галина Сюрюн шериг албан-хүлээлгелиглерге дуза көргүзер чаңгыс аай штабтың шиитпири-биле үш дугаар ачы-буян концертин эрттирип турарын дыңнатты. Ол Тываның Чазаанга, яамыларга болгаш Кызыл хоорайның албан организацияларынга база чамдык кожууннарга четтиргенин илеретти: «Бо концертче бир билетти садып алган дээрге-ле ТШО киржикчилеринге деткимчени көргүзүп, буян чедирип турары ол-дур. Концерттен кирген акша-хөреңги-биле шупту чарыгдалдарны дуглап, дайынчыларның чагыгларын садып, гуманитарлыг чүък чорудар машиналарга кывар-чаар материалдарже чарыгдалдарны үндүрүп турар. Кажан ынаар чоруур машина көвүдей бээрге, чүгле орукче 300–400 хире муң рубль чарыгдал үнер. Чижээлээрге, снайпер винтовказы (270 муң рубль өртектиг), анаа винтовкалар садар чагыглар-даа кээр. Баштайгы ийи концерттен 1 млн 100 муң рубль чыгдынган».
Республиканың шериг албан-хүлээлгелиглерге дуза көргүзер чаңгыс аай штавы ачы-буян концерттерин ай санында организастаарын планнап турар. Дараазында дөрт дугаар концерт май 18-те болур.
Алдынай СОЯН.
Буян ООРЖАКТЫҢ тырттырган чуруктары
«Шын» №28 2024 чылдың апрель 13
