Мөренниң ортумак школазынга чорааш, школаның музейин сонуургап көрдүм. Ында эң-не кол булуңну Ада-чурт камгалакчыларынга тураскаадып кылган болду. «Кым-даа, чүү-даа уттундурбаан» деп делгелгеде эрес-дидим дайынчы оолдарывыстың хөрек чуруктарын мөңгежиткен. Бис, чаңгыс чер чурттуглары, маадырларывысты кезээ мөңгеде сактып, оларга чоргаарланып чоруур бис.
Сарыг шажын булуңунда Тывага эң-не бир дугаар тывылган хүрээлерниң бирээзи — Кыргыз хүрээзиниң чуруун, төөгүзүн, бурганнар дүрзүлерин, ламаларның эдилелдерин делгеп салган.
Эң-не сонуурганчыг булуң — тыва чоннуң езу-чаңчылдарын, амыдыралын көргүскен эт-сеп, тыва өг, эдилелдер, үндезин тыва хеп дээш шупту ында. Бо делгелгеден школачылар дыка хөйнү өөренип, билип ап турар дээрзи билдингир.
Ол ышкаш музейде «Суурнуң алдарлыг кижилери», «Маадыр иелер», «Школаның төөгүзү», «Бойдус булуңу» дээш тема аайы-биле сонуурганчыг, өөредиглиг булуңчугаштарны делгээн болду. Бо-ла бүгүнү сонуургап көргеш, дыка-ла улуг ажыл кылдынган-дыр деп билдим.
Музейниң эргелекчизи Светлана Дамдын. Ол школага дыка үр үеде башкылап ажылдаан үлегерлиг башкы-дыр. Ооң ниити башкы стажы 45 чыл. Амгы үеде школа музейин удуртуп турар. Светлана Борагаевна хөй ажы-төлдүң төлептиг иези. Хоочун башкы бистиң сумунуң үлегерлиг энелериниң бирээзи. Ынчангаш Март 8 уткуштур хоочун башкыга улуг-улуг чедиишкиннерни, аас-кежикти, быжыг кадыкшылды күзедим.
Чечекмаа САДИ, ТР-ниң алдарлыг ажылдакчызы.
Эрзин кожуун.
Авторнуң тырттырган чуруктары.
“Шын” №8 2025 чылдың март 6
