Национал школа хөгжүлдезиниң институду тыва дылды деткиир болгаш сайзырадыр эчис сорулганы боттандырарын уламчылавышаан.
Ол стратегия-биле школа назыны четпээн уругларга төрээн дылын сайзырадырынче угланган «Төрээн Тывам» деп үлегерлиг өөредилге программазын эде кылыры доозулган. Орус дылче ук программаны очулдурар ажыл эгелээн. «Тыва дыл – бичии чаштарга» төлевилел-биле Тываның школа назыны четпээн өөредилге албан черлеринге уругларның тыва дылга чугаалажырын хевирлээринге байдалдарны тургузар сорулга-биле 2019 чылда программаны ажылдап кылган.
Школа назыны четпээн өөредилге албан черлеринге кижизидилге ажылының үезинде дылды «Чаңгыс дыл – чаңгыс кижизидикчи башкы» арга-биле ажыглаарын стратегияда көрген. Ол үзел-бодал ийи дылга өөредилгениң база кижизидилгениң аргаларын билир башкы кадрларны белеткээринче угланган. «Чаңгыс дыл – чаңгыс кижизидикчи башкы» төлевилелди боттандырары-биле башкылаашкын ажылдакчыларынга билиг-мергежил бедидериниң курстарын эрттирер. 2025–2026 өөредилге чылының сентябрь 1-ден төлевилелди ажылдадыр.
"Уруглар садтарының 2700 ажыг кижизидикчи башкылары болгаш ажылдакчылары каш янзы угланыышкыннарда чаа өөредилге программаларын шиңгээдип турар. Чижээ, тыва дылды сайзырадырының эчис сорулгазы-биле
«Тыва дыл — бичии чаштарга» төлевилел боттанып турар. Кижизидикчи башкыларның база башкылаашкын ажылдакчыларының билиг-мергежилин бедидеринче онза кичээнгейни салган. Россияның Чырыдыышкын яамызы ол талазында биске дузалажып турар" – деп, Тываның Баштыңы Владислав Ховалыг бодунуң блогунда бижээн.
Уруг бүрүзүнүң культурлуг бот-тускайлаңын болгаш национал байлаан арттырбышаан, ийи дылга өөредир ажыл тыва болгаш орус дылдарны хостуг шиңгээдип база ажыглап билирин хандырарынче угланган.
Бистиң корр.
“Шын” №17 2025 чылдың май 8