Март 24-те Тываның Баштыңы Владислав Ховалыг Таңды кожуунда туттунуп турар чаа школаларның тудугларын хынап четкен. Тудуг ажылдары бедик темпилиг чоруп турарын ол демдеглээн.
«Бай-Хаак биле Балгазын школаларының тудуун хынап четтим. Чурттуң Президентизиниң бот-идепкейи-биле тургустунган «Өөредилге» национал төлевилелдиң боттанылгазы-биле бо ийи школа туттунуп турар. Балгазын школазының тудуу 80 хуу туттунган. Ук тудугда 90 кижи ажылдап турар. Электри болгаш чылыгны кошкан. Чаа школаның бодунда чуунду суглар арыглаар дериг-херекселдиг база котельнаялыг. Ам чүгле девискээрин чаагайжыдар, оран-савазын аштап-арыглаар ажылдарны доозары арткан. Уруглар сентябрь 1-де бо школаның парталарынга олурар ужурлуг.
Бай-Хаак школазының дужаар хуусаазы — ноябрь. Декабрь айда ажыглалче киирер. Ол Бай-Хаактың школачыларынга Чаа чылдың белээ болур ужурлуг. Бо хүнде школаның үш өөредилге блоктарының бирээзин, ол ышкаш спорт залының корпузун тудуп үндүрген.
Чылыырга-ла, котельнаяның болгаш чуунду суглар арыглаар дериг-херекселдиң монтаж ажылдары эгелээр, объектини электри болгаш суг хандырылгазынга кожар. Шупту херек дериг-херекселдер саттынган» — деп, Владислав Ховалыг бодунуң блогунга бижээн.
Бистиң корр.
Чингис СААЯНЫҢ тырттырган чуруктары.
"Шын" №23 2024 чылдың март 27.
