2022 чылда Тыва Республиканың школаларынга капиталдыг септелге чорудары-биле «Школа өөредилгезиниң системазын чаартыры» программаже 26 көдээ школа, ооң иштинде 50 муңдан эвээш чурттакчылыг Чадаана, Ак-Довурак, Шагаан-Арыг хоорайларның 3 школазы кирген. РФ-тиң Чырыдыышкын яамызының немелде дугуржулгазы-биле 2022 чылдың август айда Бай-Тайганың Бай-Тал школазының септелгези эгелээн. Ажылдар график езугаар чоруп турар. Ол септелге бо чылдың ноябрь айда доостур.
Бо хүнде 26 школаның аразындан чүгле Шагаан-Арыг школазында, бирги керээ чарган хүлээнип алган организацияның харыысалга чогу-биле, септелге ажылдары доозулбаан. Бо чылдың август айда керээни күш чок болдургаш, хуу сайгарлыкчы А.В. Соловьева-биле чаа керээни чарган. Бо хүнде школаның эжиктерин салыр, арыгланыр өрээлдиң херекселдерин эптээр, чемненир черниң агаар үндүр тыртар системазын тургузар ажылдар чоруп турар. Ам-даа өрт-камгалал сигнализациязын тургузар, төлевилел езугаар ханаларын будуур болгаш школаның мурнуу талазында кылыр ажылдар бар. Септелге ажылдарын ноябрь айда доозарын планнап турар.
Септелге чоруп-даа турза, өөредилгениң чорудуу турбаан. Школачылар өске өөредилге албан черлеринде өөренип турар, эге класстарның өөреникчилери изиг чем-биле хандыртынган. Ол ышкаш школачыларны автобус-биле аай-дедир аргыштырар ажылды организастаан.
Бистиң корр.