Ада-чурттуң Улуг дайынынга Тиилелгениң 80 чылдаан оюнда Тываның найысылалынга республиканың ат-сураглыг чурттакчылары – Шумов алышкыларның маадырлыг чоруунга тураскааткан мемориалдыг сесерликти ажыдар. Ооң девискээринге тоолчургу фронтучуларга тураскаалды тургузуп, а шөлдү Шумов алышкыларның ады-биле адаар.
Тываның Баштыңы Владислав Ховалыг бодунуң албан ёзузунуң блогунда тураскаалды тургузар дугайында айтырыгны чазак хуралынга чугаалашканын дыңнаткан. Эрткен чылын «Таарымчалыг хоорай хүрээлеңин тургузары» федералдыг программаның күүселдези-биле сесерликтиң девискээрин чаагайжытканын регион Баштыңы демдеглээн. Хоорайның чурттакчыларынга болгаш найысылалдың аалчыларынга сесерликке аянныг дыштанырынга эптиг байдалдарны тургускан: чырыкты шөйген, шөлдү чаагайжыткан, автоматчыткан суггарылга системазын киирип, кижи кылаштаар черлерни брусчатка-биле шыпкан. Амгы үеде тураскаалды тургузар таваан белеткеп турар. Тураскаалды быжыг граниттен кылган.
«Ол кезек черниң аян-шинчизи база өг-бүлелерниң дыштаныр чери апаар девискээрни ногаажыдар төлевилелге харыысалгалыг болурун айыткан мен» – деп, Владислав Ховалыг демдеглээн. Ол тураскаалды ноябрь эгезинде ажыдар ужурлуг деп дыңнаткан.
Москваның Чурукчулар эвилелиниң кежигүнү, российжи скульптор Виталий Шанов Шумов алышкыларга тураскаалдың төлевилелин ажылдап кылган. «Российжи шериг-төөгү ниитилели» российжи ниитилел-күрүне организациязының организастааны мөөрейге ооң дөзевилел ажылы эң эки тураскаал кылдыр тиилээн. Тываның чурттакчылары мастерниң чогаадыкчы ажылы-биле эки таныш: ол – Кызыл хоорайда Щетинкин-Кравченко кудумчузунда тургускан «Кызыл кош» мемориалдыг скульптураның автору.
Бистиң корр.
Чурукту ТР-ниң Чазааның сайтызындан алган.
“Шын” №35 2005 чылдың сентябрь 11