Тыва Арат Республикадан Кызыл Шеригже кыйгырткаш, чаңгыс миномёт бөлүүнге тулчуп чораан Шумов алышкыларга тураскаалдың төлевилелинге мөөрей шилилдезин Россияның шериг-төөгү ниитилели дооскан. Мөөрейже киирген өске-даа төлевилелдер аразында Тывада ханы уткалыг ажылдарның скульптору Байза Ондарның тоолчургу алышкыларның овур-хевирин тураскаалга арттырар дээн ажылы база бар.
«Ада-чурттуң Улуг дайынының киржикчилери, ат-сураглыг фронтучулар, Тываның орус оолдары— Шумов алышкыларга тураскаал тудар төлевилелди херек кырында эгелээр ажылче кирген бис. Найысылалдың мурнуу талазында, 17 дугаар школаның чанында, паркта шөлдү белеткеп эгеледивис» — деп, Владислав Ховалыг социал четкилерде бодунуң арынында бижээн.
Шумовтарның адын мөңгежидер дээн эгелээшкинни РФ-тиң Президент Администрациязы болгаш Россияның шериг-төөгү ниитилели деткээн.
Шумов алышкылар фронтуга дораан алдаржып, оларны чарбас дээн дилээн командылал чери дыңнап, алды алышкыдан миномётчу бөлүктү тургускан. Ынаар дөрт хан төрээн акышкылар Иван, Семён, Лука болгаш Авксентий база чоок төрел дуңмалары Василий биле Александр кирген. Алышкылар дайынны шупту кады эрткеннер. Дайын соонда төрээн Тывазынче чүгле үш алышкы – Александр, Лука, Авксентий Шумовтар чанып келгеннер.
Эрес-дидим дайынчыларга тураскаал төлевилелдериниң мөөрейже чыылдазы май 25-те доозулган. Республика Баштыңының дыңнатканы-биле алырга, Улуг Тиилелгениң 80 чылында Шумов алышкыларның тураскаалын тудуп эгелээш, тургузар. Ол чүгле маадырлыг миномётчу бөлүкке эвес, а ынчан бот-догуннаан күрүне – ТАР-дан Кызыл Шеригже кыйгырткан азы фронтуже эки тура-биле аъттанган шупту өгбелерге амгы салгалдардан хүндүткелдиң мөгейии кылдыр туткан тураскаал болур.
Бистиң корр.
«Шын» №21 2025 чылдың июнь 5