Новосибирск хоорайда «Технопром–2025» XII делегей чергелиг шуулганга Тыва бодунуң ажылдарын таныштырып, эртем талазы-биле кады ажылдажылгага беленин дыңнаткан.
Чазак Даргазының оралакчызы Орлан Сарыглар биле өөредилге сайыдының хүлээлгезин күүседип турар Орлан Соян «Сибирь дугуржулгазы» регионнар аразының ассоциациязының өөредилге болгаш эртем талазы-биле координация чөвүлелиниң видеоконференция дамчыштыр эрткен улуг хуралынга киришкеннер. Чугааның кол темазы Сибирьниң эртем-өөредилге кластерин тургузары – национал хемчээлдиг айтырыгларны шиитпирлээринче Сибирь регионнарының эртем болгаш өөредилге арга-шинээн угландырар сорулгалыг улуг төлевилел болган.
Регионалдыг өөредилге яамызының эртем килдизиниң начальниги Ольга Монгуш база республика Баштыңының эртем адырында грантызын алган аныяк эртемден Айдыс Кыргыс олар шуулганга киришкеннер.
Республика бодунуң чедиишкиннерин база делгээн. Регионнар аллеязының эртем-технологтуг адырында республиканың чедиишкиннери-биле таныжып болур. Светодиодтуг ханага республиканың эртем-технологтуг хөгжүлдезиниң үре-түңнелдерин көргүскен видеороликти дамчыдып турган.
Тывада чеди эртем албан черлери, үш федералдыг болгаш дөрт регионалдыг, ол ышкаш элээн каш культура албан черлери болгаш заповедниктерден тургустунган эртем курлавыры бар. Республикада ниитизи-биле 514 кижи эртем-шинчилелдерин чорудуп турар, оларның 350-и эртем аттарлыг болуп турары бедик профессионал деңнелдиң бадыткалы.
А. МОНГУШ.
Чурукту интернет четкизинден хоолгалаан.
“Шын” №34 2025 чылдың сентябрь 4