ТР-ниң Чазааның Даргазының оралакчызы Алик Моңгуштуң удуртулгазы-биле мал чеминиң белеткелинге хамаарыштыр оперативтиг штаб ажылдап эгелей берген.
Неделя санында болуп турар хуралдарга кожууннарда мал чеминиң белеткелинге хамаарышкан айтырыгларны көдүргеш, чогуур ажылдарны чорудар.
ТР-ниң Баштыңы Владислав Ховалыг ажыл-ишчи малчыннарның дилээ-биле бо чылын Наадым байыралалын август айда, сиген-ширбииш үезинде эвес, а июль айда эрттирер дугайында шиитпирни хүлээп алган. Мал чемин эртежик белеткеп эгелээн тудум, кышты хүр-менди ажып эртериниң магадылалы бар.
Оперштабтың ажылының эгезин чарлап тура, Алик Моңгуш ТР-ниң Көдээ ажыл-агый яамызынга мал чеми белеткээриниң бетинде эрткен чылгы кыштаглаашкынның түңнелдерин өөренип көргеш, бо чылгы планын эде көөрүн сагындырган. Эрткен чылын улуг харлыг, чыккылама соок, хаттыг кыш болган. Чамдык кожууннарның малчыннарының сигени малынга четпейн баргаш, чидириглерге таварышкан. Күзүн белеткеп алган сигени четпейн барган малчыннарга муниципалдыг болгаш республика курлавырындан мал чемин берип турган. Көдээ ажыл-агый яамызы база малчыннарга деткимчени көргүскен турган.
Мал чеминиң белеткелин күштелдирер сорулга-биле суму бүрүзүнге сиген кезер бригадалар турар. Малчыннарга дуза херек апарза, доктааткан өртек езугаар тус черниң ажылчын бригадалары малчынга дузалажыр. Оон ыңай кожуун бүрүзү база курлавырлыг турар ужурлуг. А Көдээ ажыл-агый яамызы республиканың сиген курлавырын харыылаар.
2023 чылдың чайынында республиканың курлавырынга дээш 277 тонна сигенни, 7 муң тонна тараа культураларын белеткээн. Кыш дургузунда республика курлавырындан Эрзин, Тес-Хем, Өвүр, Чеди-Хөл, Улуг-Хем, Бай-Тайга болгаш Кызыл кожууннар деткимчени алган.
ТР-ниң Чазааның парлалга албанының медээзинден.
Чуруктарны интернет четкизинден хоолгалаан.
"Шын" №55 2024 чылдың июль 24
