Бөгүн, февраль 17-де, бүгү чуртта Россияның Президентизиниң соңгулдаларының дугайында соңгукчуларга адрестиг медээлер чедирер "ИнформУИК" төлевилелдиң ажылы эгелээн.
Тываның участок соңгулда комиссиязының кежигүннери бажыңнар, квартиралар кезип, соңгуурунуң чурумнарын, үезин медээлээр болгаш соңгукчуларның даңзызын ылаптап тодарадыр, ол ышкаш участоктарның болгаш бүрүткеткен кандидаттарның дугайында информастыг буклеттерни, соңгулданың болур чери, хүнү, үези, бюллетень үлээриниң чурумунуң дугайында сагындырыг саазыннарны үлээр.
"ИнформУИК" төлевилелдиң киржикчилери тускай өөредилгени эрткен. Олар кандыг-даа байдалда бодун алдынып, соңгулдага хамаарышкан айтырыгларга харыылап билир, кол-ла чүүл соңгукчуларга соңгулданың чугулазын чедирери болур.
Төлевилелдиң киржикчилери таныттынгыр хептерлиг, хөректээштерлиг, соңгулда компанияның ылгавыр демдектиг барбаларлыг, тускай шынзылгаларлыг болур болгаш хөрээнде азыткан бейджик-биле танып ап болур.
“Соңгукчуларның кым, каяа, канчаар соңгуурунуң даңзызын тодарадып турар бис. Участок соңгулда комиссиязынга боду келгеш, соңгуп болур. Бир эвес кадыының байдалы азы кандыг-бир чөптүг чылдагаан-биле чурттап турар чериниң аайы-биле бажыңынга соңгуп болур” — деп, Кызыл хоорайның 35 дугаар участок соңгулда комиссиязының кежигүнү Светлана Дружинина дыңнаткан.
“ИнформУИК” төлевилелге чурттуң 88 регионунуң барык 330 муң участок соңгулда кежигүннери хаара туттунган. Олар соңгулданың белеткел ажылының, соңгулданың чорудуунуң дугайында болгаш соңгуурунуң хевирлерин тайылбырлаар, соңгулдага хамаарышкан бүгү-ле айтырыгларга долу медээлерни соңгукчуларга чедирер.
Тывага “ИнформУИК” төлевилелдиң ажылы февраль 17-ден март 7-ге чедир уламчылаар.
Бистиң корр.
Ада ТЮЛЮШТУҢ тырттырган чуруктары.
