Дүүн, август 30-де, Тыва үндезин культура төвүнде Тываның Дээди Хуралының (парламент) соңгулдаларынга хайгааракчылар төвү удавас, сентябрь 8-те болур соңгулдаларга белеткел ажылын эгелей берген.
Ук төпке элээн каш соңгулда участоктарының болгаш соңгулда комиссияларындан дорт дамчыдылга көргүзер херекселди ук төпке быжыглаар. Соңгулданың кандыг эртип турарын дорт хайгаараарынга эптиг байдалдарны тургузары ол.
Хөй-ниити хайгааракчыларының албан-езузу-биле ажыдыышкыны 2024 чылдың сентябрь 5-те болур. Амгы үеде Тываның Хөй-ниити палатазы 3 политиктиг партия-биле болгаш 12 коммерциялыг эвес организациялар-биле керээни чарып алган. Ук партияларның болгаш организацияларның төлээлери хайгааракчылар санынче кирип турар.
Хөй-ниити штавының мониторинг талазы-биле удуртукчузу Баян-Доржу Саттың чугаалааны-биле алырга, төпке турар компьютер бүрүзү соңгулда участогунда видеохайгааралдар-биле коштунган болур.
Бо хүннерге чедир Хөй-ниити штавы ниитизи-биле 400 хамаатыны өөреткен. Олар 2024 чылдың сентябрь 8-те болур соңгулдаларга хайгааракчылар болур.
«ТР-ниң Юристер ассоциациязы» КХН-ниң даргазының оралакчызы, девискээр эксперти Аяна Ооржактың демдеглээни-биле алырга, хөй-ниити хайгааралы дүн-хүн чокка, соңгулда комиссиязы ажылдавайн турда безин уламчылаар.
Соңгулда участоктарынга каш видеокамера салыры ук оран-саваның хемчээлинден хамааржыр. Участок бүрүзүнге үннүг видеохайгаарал турар.
Бистиң корр.
«Шын» №66 2024 чылдың август 31