Тыва Республиканың Дээди Хуралының (парламентизиниң) дөрткү чыыжының депутаттарының 2024 чылдың сентябрь 8-те соңгулдаларының баш бурунгаар түңнелдериниң дугайында ТР-ниң Соңгулда комиссиязының даргазы Лариса Андалаева республиканың массалыг информация чепсектеринге дыңнаткан.
Соңгулдаларның түңнелдерин тодарадып үндүрүп турарының 2024 чылдың сентябрь 9-та байдал-биле алырга, политиктиг партияларны соңгукчуларның деткээни:
“Чаңгыс демниг Россия” партия – 80,23 хуу (97 469 соңгукчу);
Россия Федерациязының Коммунистиг партиязы – 5,24 хуу (6 370 соңгукчу);
Россияның либерал-демократтыг партиязы – 4,95 хуу (6 015 соңгукчу);
“Чаа кижилер” партия – 5,51 хуу (6 693 соңгукчу);
“Чөптүг Россия – шын дээш» партия – 3,29 хуу (3 997 соңгукчу).
Хамаатыларның соңгуур эргезин магадылаары-биле соңгулда участоктарынга, бажыңнарынга болгаш «Мобильдиг соңгукчу» дериг-херекселдиң дузазы-биле чурттап турар чериниң аайы-биле соңгуур аргаларны соңгукчуларга тургусканын, караа көрбес инвалидтер Кызыл хоорайда 24 дугаар «Медицинский» соңгулда участогунга тускай технологтуг дериг-херексел дузазы-биле соңгаанын Лариса Андалаева чугаалаан.
Республикада соңгуур эргелиг хамаатылар Тыва Республиканың Дээди Хуралының (парламентизиниң) дөрткү чыыжының депутаттарының соңгулдаларынга идепкейлиг киришкенин база ТР-ниң Соңгулда комиссиязының удуртукчузу демдеглээн. Баш бурунгаар санаашкыннар-биле алырга, соңгукчуларның 59 хуузу соңгулдаларга киришкен.
Ш. ЛОПСАН.
Буян ООРЖАКТЫҢ тырттырган чуруу.
«Шын» №69 2024 чылдың сентябрь 11
