Тываның Чазаанга тускай шериг операциязының киржикчилерин болгаш оларның өг-бүлелерин деткиир талазы-биле ведомстволар аразының комиссия хуралы болуп эрткен. Инвалид хоочуннарның социал адаптациязы, ол ышкаш бажыңнар чанында шөлдерни болгаШ подъездилерни оларга чедингир кылдыр кылыры база ис чок читкен дайынчыларның өг-бүлелеринге дуза көргүзери – чугааның кол темазы болган.
«Комиссия элээн каш чылдар дургузунда ажылдап турар. Маадырларывыс тайбың амыдыралче эглип кээрге, оларның өг-бүлелери бүгү талалыг деткимчени алыр кылдыр байдалдарны чоорту тургузуп турар бис. Республиканың баштыңы ТШО киржикчилериниң социал адаптациязын бир дугаарында шиитпирлээр сорулганы салган» — деп, комиссияның удуртукчузу, Чазак Даргазының оралакчызы Орлан Сарыглар чугаалаан.
«Ада-чурт камгалакчылары» фондунуң регионалдыг салбырының дыңнатканы-биле алырга, бо хүнде республикада инвалид болгаш курлавырже халашкан 300 ажыг ТШО хоочуннары бүрүткеттинген. Хөй кезии Кызылда, ол ышкаш Улуг-Хем, Кызыл кожууннарда чурттап турар. Фонд муниципалдыг тургузуглар-биле кады оларның чурттап турар байдалын хынааш, «Угаанныг бажың» системазын ажыглап тургаш, инвалидтерниң бажыңнарын эде салырынга дузаны кадып турар.
Ис чок читкен дайынчыларның өг-бүлелерин деткиирин база аңгы чугаалашкан. «Ада-чурт камгалакчылары» фонд ындыг өг-бүлелерге психологтуг, психотерапевтиг, социал болгаш юридиктиг деткимчени көргүзер бүрүн эргени эрткен чылдың мартта алган.
Бо ажылды дүргедедири-биле, Кызыл хоорайже биоматериалдар чедирерин организастаар харыысалгалыг кижилерни томуйлаар даалганы кожуун чагырга даргаларынга берген. Тываның Баштыңы Владислав Ховалыгның бот-идепкейи-биле ис чок читкен дайынчыларның өг-бүлелери одаар хөмүр-дашты ап, ажы-төлү школада халас чемненип турар.
ТР-ниң Күш-ажыл яамызының дыңнадыындан алырга, сөөлгү үш чылда ТШО киржикчилериниң, оларның аразында ис чок читкен дайынчыларның 1,5 муң хире ажы-төлү уругларның кадыкшылга лагерьлеринге халас дыштанган. Кызылда болгаш Кызыл кожуунда школачыларны хөй-ниити транспортунда халас аргыштырып турар.
Бистиң корр.
“Шын” №9 2026 чылдың март 12