РФ-тиң Президентизиниң уруглар эргелериниң талазы-биле бүрүн эргелиг төлээзи Мария Львова-Белованың деткимчези-биле Тывага «Кады бис» деп ажы-төлдүг херээженнерниң социал деткимче төвү ажыттынар. Кызыл кожууннуң чурттакчы чонга комплекстиг социал хандырылга төвүнүң ажылдап кылганы бо төлевилел “Чаа аргалар төптери” Бүгү-российжи грант мөөрейиниң “Ажы-төлдүг өг-бүлелерге кризис төптери” угланыышкынындан 3 сая рубль түңнүг деткимчезин алган. Россияның 77 регионундан ниитизи-биле 352 билдириишкин мөөрейже кирген.
Каа-Хем суурда Щорс кудумчузунда 10 дугаарлыг бажыңда кризис төвүнүң оран-савазын деткимче акшазы-биле бүрүн септеп, чогуур дериг-херексел-биле чепсеглээр.
Кызыл кожууннуң комплекстиг социал хандырылга төвүнүң директору Аяс Сааяның чугаазы-биле алырга, чаа төп назы четпээн ажы-төлдүг, амыдыралдың берге байдалынга таварышкан херээженнерге дуза көргүзер чер болур. Үе-шаанда психологтуг болгаш юридиктиг дузаны чедирери – кол сорулга. Өг-бүлелерни быжыглап база кадагалап арттырары, моральдыг база психологтуг байдалын экижидери, оларның иштики курлавырын, салым-чаяанын ажыдары – төптүң ажылы. Оон аңгыда ада-ие биле ажы-төл аразында өг-бүле харылзааларын быжыглап, кадагалап арттырары-биле, херээжен чонга болгаш уругларга темалыг ужуражылгаларны, мастер-класстарны, лекцияларны, беседаларны, оюннарны организастаар.
Херээжен улус төптен түр када чурттаар оран-саваны тып, аъш-чем, ажыл-агый, социал адаптация талазы-биле дузаны алыр.
«Херээжен кижи бүрүзү айыыл чок чорукту, деткимчени болгаш чаа амыдыралды эгелээр арганы алыр ужурлуг деп санаар бис. Оон-даа хөй кижилерге дузалажыр арганы бо грант деткимчези бээр» — деп, комплекстиг социал төп демдеглээн.
Бо чайын кризис төвүн ажыдары планнаттынган. Берге байдалга таварышкан херээжен чон амдыызында Комплекстиг социал төптүң түр социал чуртталга черинден дузаны дилеп азы 8 (3932) 2-23-41 дугаарлыг телефонче долгап болур.
Республиканың Күш-ажыл яамызынга хамааржыр албан черлери бо чылын грант деткимчезин чаалап алган болгаш боттандырар үшкү төлевилели ол дээрзин демдеглезе чогуур. Ооң мурнунда амыдыралдың берге байдалынга таварышкан уругларны деткиир фондунуң инновациялыг социал төлевилелдер мөөрейлеринге дараазында төлевилелдер тиилээн:
– Чөөн-Хемчик кожууннуң Өг-бүлеге болгаш уругларга социал дуза чедирер төвү «Бажыңга консультант» уругларга болгаш оларның өг-бүлелеринге эрте дуза чедирер көжүп чоруур албан черин тургузар төлевилел. Грант деткимчезиниң түңү 1,7 сая рубль. 3 харга чедир назылыг, инвалид азы сайзыралы кызыгаарлыг уругларга эртежик дуза чедирер аргаларны бо эгелээшкин-биле көвүдеткен.
– Чаа-Хөл кожууннуң Өг-бүлеге болгаш уругларга социал дуза чедирер төвү «Өг-бүле мастерскаязын тургузары» төлевилелди боттандырар дээш, 2 сая рубльдиң грантызын алган. Төлевилел ажы-төлдүг өг-бүлелерниң бот-хандырылгазын чедип алырынче угланган курлавырларны хөгжүдер ужурлуг.
Бистиң корр.
Чурукту ТР-ниң Чазааның парлалга албанындан алган.
“Шын” № 23 2025 чылдың июнь 19
