Февраль 1-ден тура РФ-тиң Социал фондузу сая-сая российжилерниң ап турары чамдык социал төлевирлериниң хемчээлин 7,4 хуу өстүрген. Ол болза, дыка хөй социал төлевилелдерни, деткимчениң хемчеглерин январь айда калбаа-биле эде санаанынга үндезилеп, пенсияларны индексаастарының болгаш эң адаккы хемчээлдерни өскертириниң ийиги чалгыы болур. Чүнүң-даа мурнунда, февраль айның өстүрүлгези инвалидтерге, дайынчы хөделиишкиннерниң хоочуннарынга, Ада-чурттуң Улуг дайынының киржикчилеринге болгаш федералдыг чиигелделер алыр эргелиг өске арткан российжилерге хамааржыр. Үстүнде адаттынган хамаатылар пенсияга немей ай санының акша төлевирлерин алырлар. Февральда ук төлевирлер өске арткан пособиелер-биле бир деңге 7,4 хуу өзер.
Ай санының акша төлевири-биле чергелештир Социал фонд ынаар кирип турар социал ачы-дуза түүн база индексастаар. Ол түүнү халас эм-таң болгаш эмнелге дериг-херекселдери, санаторийлерже путевкалар азы хоорай кыдыының электричкаларының өртээн туда дуглаарынче угландырар. Түүнү күзээни ёзугаар кезик-чамдыктап азы долузу-биле акша-биле дуглап болур.
Ай санының акша төлевириниң алыкчылары болза, Ада-чурттуң Улуг дайынының киржикчилери, бүзээлеткеннер, дайынчы хөделиишкиннерниң хоочуннары, инвалидтер болгаш инвалид уруглар, Ада-чурттуң Улуг дайынының өлүрткен (өлген) киржикчилериниң, дайынчы хөделиишкиннерниң хоочуннарының өг-бүлелериниң кежигүннери, радиация салдарындан когарааннар алыр. Ындыг хамаатыларның Тывада саны 29 муң ажыг кижи.
Февраль айда ие капиталын база 7,4 хууга индексастаар. Ие капиталының акша-хөреңгизин чаңгыс-даа катап ажыглаваан ада-иелерни эң улуг өстүрүлге манап турар. Ындыг өг-бүлелерге сан-түң 43,4 муң рубльге өзер болгаш 630 муң ажыг рубль болур. Бир эвес ийиги уругга бедиткен хемчээлдиг ие капиталы долдуртунган болгаш ооң-биле чергелештир сертификат талазы-биле кандыг-даа чарыгдал кылдынмаан болза, ук түң 57,4 муң рубльге өзер болгаш 833 муң чедир рубль болур. Сертификатта долу эвес саң-түңнү камнап алган ада-иеге февраль айның эгезинде артып калган акша-төгерикти индексастап бээр.
Ие капиталындан аңгыда, уруг-дарыглыг апарган өг-бүлелерге өске-даа төлевирлерни база өстүрер. Чижек кылдыр алырга, Социал фонд ажылдавайн турар ада-иелерге чаш уругну 1,6 хар чедир ажаап-тежээринге ай санының пособиезин, чаш уруг төрүттүнүп келгенде азы азырап алганда, ай санының пособиезин, а ол ышкаш иштелип-саатталганда база божаанда ай санының пособиезин өстүрер. Оларны өске арткан төлевирлер дег 7,4 хууга индексастаар.
Бүгү өстүрүлгелерни Социал фонд боду кылыр, ынчангаш хамаатылар билдириишкин бижип, документилер чыып маңнап турбас.
Социал фондунуң медээзинден А.ХЕРТЕК белеткээн.
“Шын” №11 2024 чылдың февраль 14