ОРУК АЖЫЛДАКЧЫЗЫНЫҢ ХҮНҮНГЕ УТКУШТУР
(Фоторепортаж)
Тываны анаа эвес “дугуйлар кырында республика” деп адай берген. Чүге дээрге республиканың иштинге болгаш оон дашкаар ажыл-херек-даа, аян-чорук-даа аайы-биле чүгле автомобиль транспорту-биле Тываның чурттакчылары аргыжып турар. Тывада үш өг-бүлениң бирээзинде-ле автомобиль бар.
Тыва “дугуйлар кырында” республика болгаш, ооң девискээрин муң-муң километр узун оруктар аргый шыва алган. Ол оруктарны тудуп, оларны хайгаарап, септеп турар кижилер – орук ажыл- агыйының ажылдакчылары. Орук ажыл-агый ажылдакчызының хүнүн 2023 чылда октябрь 15-те бүгү Россияга демдеглеп эрттирер. Профессионал байырлалынга уткуштур орукчулар солун чүүлдерни эрттирип, боттарының нарын болгаш белен эвес ажылы-биле Тываның чурттакчыларын таныштырып турарлар.
Дүүн, октябрь 10-да, Тыва Республиканың күрүне лицейиниң 6 “Б” клазының өөреникчилери орукчуларга аалдап барып чорааннар. “Восток” тудуг ниитилелиниң орук материалдарының шынарын хынаар лабораторияның начальнигиниң оралакчызы Анна Анисимова болгаш “Тываавтоорук” күрүне албан чериниң орук шынарының болгаш конторолюнуң килдис начальниги Вячеслав Саны-Хоо олар лабораторияга орук тудуунга хереглеп турар материалдарның шынарын канчаар хынап турарын тайылбырлап чугаалап бергеннер. Орук материалдарын холдарынга тудуп, оларның дугайында солун чүүлдерни уруглар, оолдар билип алганнар.
Кызыл хоорайда политехниктиг техникумнуң башкызы Сергей Белоусов ТР-ниң Күрүне лицейиниң 6 “Б” клазының өөреникчилерин Колхозная кудумчуда чаартыр тудуп турар орукка чедирип, орукка чоруурунуң дүрүмнеринге хамаарыштыр айтырыг-харыы мөөрейни эрттирген. Кудумчуга шимчээшкинниң дүрүмнерин багай эвес билирин лицейниң өөреникчилери көргүскен.
Экскурсиялап чораан оолдар, уругларның шуптузунга орукчулар чигирзиг белектерни берген.
Ш. МОҢГУШ.
Авторнуң тырттырган чуруктары
«Шын» №77 2023 чылдың октябрь 11