Венгрияга октябрь 7-ден 12-ге чедир хостуг хүреш болгаш грек-рим хүреш маргылдаазынга Россияның шииткел күүселдезиниң федералдыг албанының Тыва Республика талазы-биле эргелелиниң ажылдакчызы Соян Сонам Тываны төлээлеп киржир.
Соян 5 класска-ла хүрежип эгелээн, чүге дизе ооң өгбелери шупту мөгелер чораан. Чаңгыс чер чурттугларының канчаан хүрежип чораан төөгүлериниң ачызында, ол спорттуң бо хевирин сонуургап эгелээн. Оон бээр 20 чыл дургузунда ол чуртталгазын хостуг хүрешке бердинип чоруур. Бо чайын спортчу шилилге чадаларны эрткен.
Хостуг хүрештен аңгыда, национал тыва хүреш база Сонамның бир сонуургалы, ынчангаш ол ТР-ниң Хартыга мөгези деп атты эдилеп чоруур. Амгы үеде ол хостуг хүрешке ынактарның чыглыр чери «Автомобилист» спорт клубта белеткелдер эртип турар.
Мөгевиске чедиишкиннерни күзеп каалы!
Медээ болгаш чурукту Россияның шииткел күүселдезиниң федералдыг албанының Тыва Республика талазы-биле эргелелиниң парлалга албанындан алган.