* * *
Көзенээмче чемдигир ай херел чажып,Көрүксээн дег, арнымдыва бакылай-дыр.
Даамчырап, уйгу-дышка чагыртпайн,
Дамыр дыңзып, чүрээм чиктиг тиккилей-дир.
Күчү-күжүң сорунзалаан дүлгээзинден
Күзел, бодал сарыыл чокка аскымнаткаш,
Частып орар чечек ышкаш овуруңче
Чажыт ужук, кокпа дилеп ужугар-дыр.
Чалыы шаанда кижи бүрү сөглеп эртер
Чаяан-дөстүг, өлүмү чок мөңге Сөстү
Буурарган удумзургай ыржым өттүр
Чассыг, уян ырлаксаам кээп, одуг-дур мен.
Бурун шагдан бойдус чаяан Ынакшылды,
Бурган өршээ, эки хүнде уткуп аалы.
* * *
Ийи карааң доза шапкан чыварындан
Ишти-хөңнүм көжүп, хаарлып, тырлы бержик.
Эргин артап чоруй барган кылажың-на
Эъдим-чүрээм шегелей дээп, дагжап артчык.
Ажыы чидип суглаярбаан кударалым
Аакталган ырым болуп хуула берген.
Күскү хойтпак быжып дүшкен шимези дег,
Күжүр боттуң бажын аартып чыдып калган...
Бо хүн көңгүс манавааным чагааң харын
Болгаанныг чок куюм өйже ыдалапты.
Буруузунган каш сөзүң номчуп ора,
Будалганың өршээги дег уярадым...
Оо, бурган, шак бо чараш херээженниң
Оруун доспас күчү-күштен хайырлап көр.