Подиумнуң хоочуну
79 харлыг Дешуа Ванг 2015 чылда Пекинге болган Кыдат мода неделязында подиумга үнүп кээрге, ону «Амгы үениң эң-не изиг ханныг кырган-ачайы» деп адап каан. Ооң соонда Ванг дораан-на сураглыг кыдат модель апарган, ону хөй-ле съёмкаларже чалап эгелээн. Эң-не солун чүүл, ол кажан-даа модель турбаан, анаа бөдүүн актёр турган. Ол черле бодунуң мага-бодун алдынар чаңчылдыг. 50 харлыында спорт залы барып эгелээн, 70 харлапкаш үргүлчү системажыткан тренировкаларны чорудуп эгелээн.
Диджей кырган-авай
Британия чурттуг 70 харлыг Рут Флауэрстиң чуртталгазы 2001 чылда хеп-хенертен өскерилген. Руттуң уйнуу төрүттүнген хүнүн кежээки клубка демдеглээр дээш, кырган-авазын дөмей-ле келбес деп бодал-биле, анаа хүндүлеп чалаан. Кырган-авазы келбес хамаанчок, харын-даа клубка ижиге берген. Ол кежээ соонда, Рут бодун диджей кылдыр шенеп көөрүн уйнуунга саналдаан.
Угаангыр-сагынгыр уйнуу кырган-авазын шоодар туржук, аңаа продюсер тып берген. Продюсери Руттуң эрестиин кайгап ханмайн, Мами Рок деп шола атты тывыскан. Кырган-авайга микстер тургузарын өөреткеш, сцена хеви, каасталгаларны шилээш, сураглыг кижилер-биле кежээлер эрттирер үнүүшкүннерни тургузуп берген. Оон эгелээш-ле Рут европейжи танцы сценазынче чаза теп үнген.
Ийи чыл эрткенде, Мами Рок долу гастроль расписаниелиг апарган, а сезен харлыында ол делегей чергелиг супер-сылдыс болган. Аай-дедир ужудуушкуннар, отельдер, дүнеки чуртталга… Аныяктар безин шыдашпас график кырган-авайга чүү-даа эвес болган. Ол 83 харлыынга чедир долу клубтарны чыып келген. Бир хүн, гастрольдар аразында, бажыңынга дыштанып келгеш, креслога олчаан удуй берген.
Чуруктарны интернеттен хоолгалаан.
“Шын” №19 2025 чылдың май 22