Удуртукчузу Тываның улустуң
чогаалчызы Мария Күжүгет
***
Чүгле чаңгыс, чугула кол өнчүм ышкаш,
Чүрээм одун чүшкүрбүшаан, кыпсып чоруур
Чурууңну ам көрүп ора, бодаарымга,
Чуртта калган өскүс анай сагындырар…
Хуу бистиң салымывыс аңгы-даа бол,
Кударанчыг үелерде сактып келгеш,
Шагдагы сээң чурууңну-ла катап көрүп,
Шаамга киир шыгжап алган чоруур-дур мен.
Салым-хуунуң биске сөңнээн өлчей-кежии –
Салбак тыртып өзүп орган чаптанчыг чаш.
Ынакшылды хумагалаар эриг сеткил
Ынчан биске турбааны-ла харааданчыг...
Аалда өскүс анай-кысты базынчактап,
Араатан-на аглаваза, ажырбас оң.
/ Эрес Кол.
***
Хоозун эвес, эрткен оруум, эрткен үем,
Салым-чол-даа демир-орук болуп алган.
Сактыышкыннар көзенээмге чуруттунуп,
Хостуг чаңнаан, чараш бойдус болуп алган.
Салбараңнаан, шыпыраңнаан ыяштар дег,
Саадатпайн, хүннер эртип, шуужуп-ла тур.
Үнүп-кирген, кады чораан кижи бүрү,
Башкы болуп, бир-ле чүүлге өөреткештиң,
Үр-даа болбайн: – Чедер черим келген-дир – дээш,
Байырлашкаш, орук ара дүжүп каар-дыр.
"Чуртталга" деп демир-чычаан мени чүктээш,
Чурумалдыг черлер кезип, тояап бар чор...
/ Сандак Самбажык.
***
Богараа дег, кагып-суксаан дачыы чүрээм
Боралгактыг аш куу черге бойлаар чедип,
Болчумча чок бо-ла сарыг өртемчейге
Болчаттылыг үүлем чүктеп калгып чор мен.
Кадыр туруг ийинден кээп чуглур чазып,
Кашпал хемниӊ аламынга дүлнүр чедип,
Каш удаа холум салып, дүжүп берип,
Хараал кирип, алзыр чыгыы тенек чордум.
«Аал-түме хоозун сөстер төөредип боор
Адаглаарда, адааргалдыӊ адаа аар» деп,
Акшый берген ирей меӊээ ону сөглээн.
Арты-мурнун, арыг шынны ылгай көрүп,
Аазын эмген кем чок төл дег, шимчеп чорза,
Амыдырал үүжези дүжүткүр боор.
/ Ондар Мөңгүн-Сай.
Москва.
“Шын” №3 2024 чылдың январь 30