Шрифт
А А А
Фон
Ц Ц Ц Ц Ц
Изображения
Озвучка выделенного текста
Настройки
Обычная версия
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы
(видео, карты и т.д.)
Вернуть настройки по умолчанию
Настройки Обычная версия
Шрифт
А А А
Фон
Ц Ц Ц Ц Ц
Изображения
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы (видео, карты и т.д.)
Вернуть настройки по умолчанию

Сорунзажыларның ажылдарын үнелээн

24 декабря 2024
8

Тыва Республиканың чогаалчылар эвилелиниң организастап эрттиргени аныяк чогаалчылар семинары ноябрь 8–9 хүннеринде Тыва культура төвүнге болуп эрткен. Ук семинар ийи хүн уламчылаан. Баштайгы хүнде шүлүк чогаалынга, а ийи дугаар хүнүнде проза чогаалынга хамаарыштыр сайгарылгалар болган. Тываның күрүне университединиң филология факультединде ажылдап турар «Сорунза» чечен чогаал каттыжыышкынының кежигүннери семинарның кайы-даа кезээнге идепкейлиг киришкеннер.

Семинарның шүлүк чогаалынга хамаарышкан кезээн Тываныӊ улустуӊ чогаалчызы Мария Күжүгет болгаш Чогаалчылар эвилелиниң кежигүнү Эрес Кол удуртуп эрттирген. Удуртукчулар семинарже чоруткан чогаалдар-биле баш бурунгаар номчуп танышкан. Семинарга киржип келген аныяк чогаалчыларның шүлүктерин сайгарып тургаш, кымның кандыг частырыг кылып турарын, улаштыр канчаар бижиирин сүмелеп тура, чижек кылдыр кезек шүлүктерни хоюглап, авторлар-биле кады ажылдааннар. Удуртукчулар-биле бир деңге киржикчилер база боттарының санал-оналын берип турган. Чаңгыс сөс-биле чугаалаар болза, ажык сайгаржылга кичээл болган.

Шүлүк кезээнге «Сорунза» чечен чогаал каттыжыышкынын Самбажык Сандак, Мөңгүн-Сай Ондар, Алдынай Монгуш, Соруктуг Шивитпей, Буян Ооржак, Сай-Даш Таскый төлээлеп киришкеш, шупту эки үнелелдерни алганнар. Ылаңгыя Мөңгүн-Сай Ондарның шүлүктерин онзагайы-биле үнелээн. Ооң дылының уран-чеченин, cөс курлавырының байлаан киржикчилер болгаш удуртукчулар эскерип демдеглээн. Ол ышкаш, Алдынай Монгуштуң шүлүктерин болгаш очулгаларын эки үнелээнин демдеглевес арга чок. Ол С. Есенинниң «Письмо матери», Э. Асадовтуң «Я могу тебя очень ждать» деп шүлүктериниң тыва дылче очулгаларын семинарга киириштирген.

Сандак Самбажыктың шүлүктерин сайгарып тура, чаңчылчаан хевирлерге доктаавайн, бодунуң аянын тып бар чыдар аныяк шүлүкчү деп үнелээн.

Ийи дугаар хүнде проза кезээн Чогаалчылар эвилелиниң даргазы Саяна Өндүр, Тываның улустуң чогаалчызы Николай Куулар, эвилелдиң кежигүннери Лара Хомушку, Зинаида Серен-Чимит, Эрес Кол удуртуп эрттиргеннер. Проза чогаалын бижип, шенеп чоруур аныяктар эвээш эвес дээрзин ук семинар көргүскен. Бистиң сорунзажылардан проза кезээнге Мөңгүн-Сай Ондар биле Самбажык Сандак киришкеннер.

Проза кезээнге болган сайгарылгаларга Самбажык Сандактың «Ыт, Ирбиш болгаш Күске» деп чаа тоолун улуг сонуургал-биле шупту номчаан. Ооң чогаалынга удуртукчулар эки үнелелди берип тура, аныяк авторнуң чогааткан тоолу уруглар чогаалынга кончуг таарымчалыг дээрзин демдеглээн. Аңаа чергелештир Мөңгүн-Сай Ондарның «Оруктар» деп чечен чугаазын семинарның удуртукчулары болгаш кежигүннери сайгарып көргеннер. Амыдыралдың социал чидиг айтырыгларын чогаал аргалары-биле шиитпирлээрин оралдажып турар аныяк чогаалчы деп үнелээн.

«Сорунза» чечен чогаал каттыжыышкыны барык 20 чылдың дургузунда Тываның улустуң чогаалчызы Мария Амын-ооловна Күжүгеттиң удуртулгазы-биле чедиишкинниг ажылдап турар. Ук каттыжыышкындан Чогаалчылар эвилелинче Шончалай Мааты-оол, Эрес Кол, Кежик Конзай кирген. Олар дагдыныкчы башкызынга катчып, соондан кел чыдар сорунзажыларга ачы-дузазын кадып, арга-сүмезин берип чоруурлар. Демниг ажылдажылганың түңнелинде аныяк чогаалчылар семинарынга сорунзажылар эки үнелелдерни алган.

Соруктуг ШИВИТПЕЙ,

“Сорунза” чечен чогаал каттыжыышкынының кежигүнү.

“Шын” № 98 2024 чылдың декабрь 21