Ча адарынга СФО-нуң тиилекчилери.
Томск хоорайда “Эльбрус-Арена” деп спорт комплекизинге март 19–23 хүннеринде, чурум езугаар, 21 харга чедир аныяктар база 18 хар чедир элээдилер аразынга Сибирь федералдыг округтуң бирги чери дээш ча адар маргылдаа болуп эрткен.
Ук маргылдаага Сибирьниң 6 регионундан 130 спортчу киришкен. Маргылдааның кол сорулгазы — спорттуң ча адар хевирин сайзырадыры база СФО-нуң адын Россияның бирги чери дээш болур маргылдаага камгалаары-биле, чыынды команданы тургузары.
Чидиг демиселдиң түңнелинде бистиң республиканың аныяк спортчулары шаңналдыг черлерже киргеннер.
Хууда бирги чер дээш хемчээлдер аайы-биле бирги черлерни 21 хар чедир адыгжылар аразынга Виктория Ондар, Нимаа Кыргыс, Айыраа Дарымажаа алганнар. Дараазында команда аайы-биле 18 хар чедир элээдилер аразынга 1 дугаар черни кыс уруглар аразынга Виктория Ондар, Аида Тагба, Лия Монгуш, оолдар аразынга Адыгжы Тагба, Айдаш Ямбиль, Айдемир Намшой чаалап алганнар. 2 дугаар черни оолдар аразынга Сонам Ойбаа, Рагчасурен Ханды, Алдын-Херел Хомушку, уруглар аразынга Айыраа Дарымажаа, Саглай Оюн, Идегел Барынмаа алганнар.
Маргылдаага ча адарынга Россияның спорт мастери деп хүндүлүг атты алырының хемчеглерин Айыраа Дарымажаа күүсеткен.
Кик-боксерларның тулган чедиишкиннери.
Красноярск хоорайга март 18–22 хүннеринде кикбокстуң лайт-контакт база лоу-кик хевирлеринге СФО-нуң чемпионады болгаш бирги чери дээш маргылдаалар болуп эрткен. Ук маргылдааларга СФО-нуң 10 регионундан 854 спортчу киришкен.
Оларның аразында бистиң республикадан 120 кик-боксер, 8 тренер, 3 шииткекчи, 1 удуртукчу бар. Ук маргылдааның кол сорулгазы – Россияның чемпионадынга база бирги чери дээш маргылдааларга киржир эргени чаалап алыры.
Бо удаада тыва спортчулар шыырак белеткелин, күштүүн бадыткап, дараазында шаңналдарга төлептиг болганы улуг чоргаарал база чедиишкин. Маргылдааның түңнелинде 26 алдын, 13 мөңгүн, 31 хүлер медальдарга төлептиг болганнар.
Ол ышкаш дараазында спортчулар тускай шаңналдарны (“форвард” деп спортчу костюмнар) алганнар. “Тергиин кик-боксер” деп атты эр улус аразынга 71 килдиң чемпиону Эртине Шокпаа (“Олимп” спорт школа), «Эң чараш техника” дээш аныяктар аразынга 67 килдиң тиилекчизи Баткар Мөгедир (Улуг-Хем) болганнар.
СФО-нуң элээдилер база аныяктар аразынга тиилекчилери болгаш шаңналдыг черлерже кирген спортчулар май 18–23 хүннеринде Казань хоорайга болур Россияның бирги чери дээш маргылдаага киржир эргени чаалап алганнар. Ол ышкаш улуг спортчулар аразынга СФО-нуң чемпионнары база шаңналдыг черлерже киргеннер. Ноябрь 25–31 хүннеринде Каспийск хоорайга (Дагестан) болур чемпионатка киржир.
Гимнастика база өөрүнчүг медээлер.
Новосибирск хоорайга март 21–23 хүннеринде регионнар аразында чаңчыл болган “Часкы вальс” деп уран чүүл гимнастиказынга маргылдаа бедик деңнелге болуп эрткен.
Бо маргылдаага ЦСКА – Тыва спорт школазындан тренер башкы Алена Удодтуң өөреникчилери чедимчелиг киришкеннер. Уруглар 1 алдын, 2 мөңгүн медальдарны чаалап алганнар.
“Спорт мастеринге кандидат” деп программаның “С” хевиринге 1-ги черни бүзүрелдии-биле 2011 чылда төрүттүнген Даяна Куулар чаалап алгаш, алдын медальга төлептиг болган. Ооң эжи Полина Цыганкова (2010 ч.) 2-ги черни алгаш, тренерин өөрткеннер. Улаштыр “Спорт мастери” деп программаның “В” хевиринге 2008 чылда төрүттүнген Тамилана Тукар 2 дугаар черни ап, мөңгүн медальды алган.
Дараазында ЦСКА – Тыва спорт школазының өөреникчизи амгы үеде Сибирьниң күш-культура болгаш спорт талазы-биле күрүне университединиң студентизи Шурума Ооржак база улуг чедиишкиннерлиг болган. Бо хүннерде ол Москвада Ирина Виннер аттыг спорт өргээзинде Россияның дээди өөредилге черлериниң командаларының аразында Кубогу дээш эстетиктиг гимнастика маргылдаазында бодунуң өөренип турар университединиң адын камгалап турар.
Хөккей маргылдаазы.
Красноярск хоорайга март 22–24 хүннеринде хөккейге хандыкшылдыгларның аразынга чаңчыл болган хөккей чемпионадының оюннары болуп эрткен. Аңаа бистиң республикадан “Сүбедей” командазы эки ойнап, 2 команданы уткаш, база 1 команда-биле хайым болган соонда, шайба киир октаарынга аштырган. Хөккейжилер база “Сүбедей” спорт школазының тренерлеринге, удуртулгазынга байырны чедирип, Тывага хөккей спорту хүреш ышкаш сайзыраар болзун деп күзедивис.
Сүбедейниң шаңналы дээш элээдилерниң бут бөмбүү.
“Сүбедей” спорт школазының Кубогу дээш март 22–23 хүннеринде 14–15 харлыг оолдар аразынга футбол маргылдаазы болуп эрткен. Аңаа ниитизи-биле 8 шилиттинген шыырак команда ойнаан. Ийи хүн иштинде бедик көдүрлүүшкүннүг изиг оюннарның түңнелинде бирги черни бүзүрелдии-биле Шагаан-Арыгның 2 дугаар школазының “Ноян” командазы 1-ги черни чаалап ап, Сүбедейниң Кубогунга төлептиг болганнар. Шаңналдыг 2–3-кү черлерни “Сүбедей” спорт школазының база Сүт-Хөлдүң Суг-Аксы ортумак школазының командалары үлешкеннер.
Алексей ЧАМБАЛ-ООЛ, спорттуң хоочуну.
Чуруктарны интернеттен алган.
«Шын» №11 2025 чылдың март 27