Республиканың болгаш Кызыл хоорайның эң шыырак спортчуларының бирээзи чораан бильярдчы Александр Хойлакааның адынга тураскааткан бильярд маргылдаазын хоочун башкының болгаш спортчунуң өг-бүлези, ук-салгалы “Юбилейный” бильярд залынга организастап эрттирген.
Математикага Тываның дээди эртемниг баштайгы башкыларының бирээзи, Тыва Арат Республика үезинде Кызылдың каттышкан (амгы 2 дугаар) школазының баштайгы директору Ооржак Сундуевич Хойлакааның оглу, хөгжүм башкызы Александр Ооржакович аңгы-аңгы профессиялыг, янзы-бүрү сонуургалдыг кижи чораан. Кызылдың уран чүүл училищезин (амгы колледж) дооскаш, Эрзин, Барыын-Хемчик дээш өске-даа кожууннарның болгаш Кызыл хоорайның школаларынга хөгжүм башкылап чораан. Хөгжүм башкызы эртеминден аңгыда электрик, бызаңчы дээш ниитизи-биле беш хире мергежилдерни шиңгээдип алган “алдын холдуг” мастер. Кызылдың 3 дугаар бичии уруглар садынга 26 чыл дургузунда хөгжүм башкылап ажылдаан. Ажы-төлдү хөгжүмге, ыр-шоорга өөредиринден аңгыда, уруглар садының электригиниң, бызаңчызының ажылдарын база кылыр салым-чаяанныг хөгжүмчү Александр Хойлакаа солуттунмас кижи чораан.
Ооң эң ынак хандыкшылы – бильярд ойнаары. Элээди оол назынында-ла Кызылдың Гастелло аттыг дыштанылга парыгында бильярд залынга ойнакчыдан карактың көскүзү, холдуң дыңзыы, угаан-бодалдың кичээнгейлии дээш өске-даа мөзү-шынарларны негээр спорттуң бо хевиринге ойнап өөрени берген. Арга-мергежили бедээш, республиканың эң шыырак бильярдчыларының санынче кирген.
Александр Хойлакааның спортчу адынга тураскааткан бильярд маргылдаазынга кожууннарның болгаш Кызыл хоорайның шыырак бильярдчылары киришкен. Оларның аразында Александр-биле кады ойнап чораан Дандар-оол Ооржак, Арланмай Ондар, Юрий Норбу, Анатолий Сарыглар дээш өскелер-даа бар.
Ийи хүн уламчылаан чидиг демиселдиң түңнелинде Олег Кол бирги черни ээлээш, чемпион атка, кубок, медаль болгаш акша шаңналынга төлептиг болган. Ийиги черни Бай-Тайга кожууннуң Шуй суурдан Харлыг-оол Хертек чаалап алгаш, Мактал бижик, медаль болгаш акша шаңналы-биле шаңнаткан.
“Шынның” корр.Опубликовать сейчас
Спортчунуң шаңналы.
27 августа 2022
45