Экии, «Шын» солуннуң редакциязы!
Кызыл хоорайның Спутник микрорайонунуң хөй санныг чурттакчыларының мурнундан бижип олур бис. «Шын» солуннуң доктаамал номчукчулары болгаш чоннуң чагааларын, дилег бижиктерин, хомудалдарын үргүлчү чырыдып турар деп билир бис. Ынчангаш бисти дүвүредип турар айтырыгны база солун арнынга көдүрүксеп тур бис.
Бистиң чурттап турар черивисче автобустарның аргыжылгазы дыка эки: 108, 4«а», 6«а», 5 «а» үзүктел чок халдып турар. Чоокку хүннерде 4 дугаар автобус база маршрутче кирип келди. Бо автобустарның хөй кезии МЖК автобус доктаамының соонда дораан ээп чоруй баар. Полигонная кудумчузу-биле дорт халдыр чаңгыс 6 «а» бар. Аразы 10 минута болгаш-ла халдып турар. Хоорайдан кирип кээр трасса-биле дорт халыткаш, Эрзинская кудумчузунда трасса аразы ийи светофорнуң аразында шынында 2 автобус доктаамы бар: МЖК биле орук кыдыынче аңгы кылдыр кылып кагбаан бир доктаам бар. Ону «Угаанныг транспорт» деп капсырылгада Полигонная деп айтып каан, а кондукторлар болгаш чолаачылар ооң адын "Проход" деп адаар болду. Чамдыкта шуушкан машиналар көвүдей бергенде, 6 «а» аңаа турбайн, халдып эрте бээр. Чүге турбайн баарын айтырарывыска: «Соовустан КАИ кээр болза, озал-ондак кылып болур айыылдыг черде туруп турар силер дээш, 5 муң акшага торгаап каап болур чүве-дир, мэрияже автобус доктаамын негелде, дүрүм ёзугаар шын кылып бериңер деп чагаадан бижиңер» – дээр болду. Чолаачыларның хөй кезии корга-корга туруп, пассажирлерни олуртуп, дүжүрүптер. Бир автобус бар: чолаачызы туруксаарга-даа, кондуктору ынатпайн баар, хей-ле пассажирлерни кончуур. Хөй аал чурттаар каът бажыңнар улузу МЖК-га дүшкүлеп каар, оон олурар, а СТО чоогунда ол трассаның ийи талазында чер бажыңнар чурттакчылары боттарынга чоок автобус доктаамындан олурар, аңаа дүжер дээрге, негелдеге дүүштүр доктаам кылдынмаан. Ол хирезинде капсырылгада бар кылдыр айтып турар. Трассаның кыдыгларынче карманнар кылып, асфальт чаттынмас-даа болза (чогум автобус туруптар хостуг чер бар), оода орук демдектеринден салып каан болза деп күзелдиг бис. Доктаап чыдар автобус кырынче хөме-ле халдып кээр улуг чүък машиналары бар боор чорду. Ынчангаш чолаачы бүрүзү ында автобус доктаар чер бар деп көрүп, билип чоруур кылдыр оода орук демдектеринден салып каарын дилеп тур бис. Даянгыыштыг, кырган-дижең, чаш уруг-дарыг көдүрген, четкен иелер, өөреникчи ажы-төл дээш аңаа дүжер, оон олурар чурттакчылар хөй улус бис.
Бистиң дилээвисти өөренип көрүп, хандырып бээринге идегеп арттывыс.
/ Марта, Кенден МОНГУШТАР.
“Шын” №43 2025 чылдың ноябрь 6