Кызыл хоорайның Спутник микрорайонда Культура сайзыралының төвүнүң тудуу удавас доостур, ооң белени 93 хуу. «Культура» национал төлевилел-биле 2022 чылда эгелээн культура объектизи амгы үениң база хөй талалыг ажыл-чорудулгазы-биле анаа клубтардан ылгалып турар.
Төптүң оран-савазы бир каът, үш улуг блоктардан тургустунган, ниити шөлү — 1100 дөрбелчин метр. Ында 250 олуттуг көрүкчүлер залы, идик-хеп солуп кедер өрээлдер, администрация кабинеттери, суй белектер делгээр девискээр, өг-бүлелер дыштаныр база бөлгүмнер эрттирер залдар бар.
Амгы үеде тудугда электри хандырылгазының дериг-херекселин эптээр, эжиктер салыр, ханалар чугайлаар дээш өске-даа ажылдар чоруп турар. Иштики ажылдардан аңгыда ооң девискээрин чаагайжыдар, хериминиң иштинге брусчатка чадар ажылдарны чергелештир кылып турар.
Смета-төлевилел ажылдап кылырындан эгелээш, чөпшээрел документация, девискээрни чаагайжыдарынга чедир бүдүн комплекс ажылды «Сельстрой» КХН хүлээнип алган. Ол республикада улуг объектилер тудуп турар тус черниң дуржулгалыг тудуг организациязы-дыр. Ооң кылган тудугларынга найысылалда Национал музейниң, хоорай судунуң оран-савазы, Аныяктар өргээзиниң эге ажылдары, чуртталга бажыңнары дээш өске-даа тудуглар хамааржыр.
«Культура» национал төлевилел-биле тудуг объектизинче 165 млн рубльди аңгылаан. Эгезинде керээни 133 млн рубльге чарган турда, тудуг материалдарының өртээниң өскенинден бо чылын ол акшаның түңүн улгаттырган. Немелде 36 млн рубльди республика бюджединден аңгылаан. Тудугну бо чылдың октябрь айда бүрүнү-биле доозарын планнап турар.
Бистиң корр.
"Шын" №58, 2023 чылдың август 5