Бистиң чуртувуска ук байырлал чүгле Октябрь революциязының соонда 1917 чылда келген. Май 1-ниң чыскаалынче албан үнер кылдыр большевиктер доктааткан. Чыскаалче үнмээн улусту торгаап, харын-даа ажылындан безин үндүрүп турган. Байырлыг чыскаалды бүгү-ле төп телеканалдарга дорт дамчыдылга таварыштыр көргүзер. Аңаа сая-сая кижилер киржип чораан.
Байырлалга айдан эвээш үе дургузунда белеткенип келир. Улуг ама саазыннарга “Тайбың! Күш-ажыл! Май!”, “Май 1 делгерезин!” деп эң-не нептереңгей кыйгырыглыг плакаттарны чуруп алгаш, билдингир политиктерниң чуруктарын парлап алыр турган. Шариктер албан турар. Олар чокка болдунмас.
Бир дугаар байырлал чыскаалы 1918 чылда Москвага болган. Кызыл шөлге күш-ажылчы кижилер чыскаалып алгаш эртерге, КПСС партиязының кежигүннери оларга байыр чедирерлер. Ыры-хөгжүм чаңгыланып, кижилер ырлажырлар. Байырлыг чыскалче бичии уругларын безин эдертип алгаш, эктинге олуртуп алыр турган.
Таптыг-ла ол үеде “маевка” деп сөс тыптып келген. Ажылчын кижилерниң арыг агаарлыг черге чыглып келгеш, чугула айтырыгларны сайгарып чугаалажырын ынча дээр.
ССРЭ дүшкен соонда политиктиг утказын чидирипкеш, ындыг-ла чугула эвес апарган. 1990 чылда ол хүннү Частың болгаш күш-ажылдың байырлалы кылдыр эде адаан.
Бистиң корр.
Чуруктарны интеорнет четкизинден алган.
