Июль 9–11 хүннеринде “Үстүү-Хүрээ” дириг хөгжүмнүң болгаш чүдүлге-сүзүглелдиң делегей чергелиг фестивалы ол-ла болуп турганы черге, Чадаана хоорайның чанында шөлчүгешке болур.
Бо чылын болур фестивальдың хедлайнериниң азы хөйнү сонуургадып, бодунче хаара тудуп турар билдингир бөлүктерниң бирээзи “Хартыга” рок-бөлүү. Ол чээрби чыл үргүлчүлелдиг болган фестивальдың эң-не чедиишкинниг төлевилели деп санадып турар.
«HARTYGA» («Хартыга») Кызылга 2003 чылда тургустунган. Бөлүк 2008 чылда бир дугаар “Үстүү-Хүрээ” фестивалынга киришкеш, “Энергия” деп номинацияга тиилээш, чылдың-на аңгы-аңгы номинацияларга тиилекчилер болуп келген: 2009 чылда– “Хөгжүмде эксперимент”, 2010 чылда – “Тергиин эксперимент”, 2011 чылдан амгы үеге чедир фестивальдың хедлайнери болуп турар.
Бо бөлүк 2012 чылда Красноярск хоорайга болган «ЕниJazz" фестивальдың лауреады, 2013 чылда Улан-Удэге болган V Бүгү-делегейниң “Голос кочевников” фестивалынга хедлайнер болган, ол-ла чылын Шушенскоеге “Мир Сибири” делегей чергелиг фестивальга “Эксперимент” номинацияга тиилээн. 2013 чылда ТР-ниң Культура яамызының Тыва уран чүүл болгаш культура адырында шылгарааннарны илередир чылдың тыпсыр шаңналының “Дебют” номинациязынга төлептиг болган. 2014 чылда Якутск хоорайга делегей чергелиг амгы үениң хөгжүм фестивалының хедлайнери болган. Ол-ла чылын Абаканга “От Ыры” этно-фестивальдың Гран-При шаңналын алган. 2015 чылда Свердловск облазының Камышлов хоорайга болган «УралТерраДжаз» фестивальдың “ажыдыышкыны” болган. 2016 — Tallinn Music Week фестивальдың киржикчизи (Эстония), 2017 — "Дикая Мята" фестивальдың хедлайнери (Тула облазы), 2017— "Сердце Евразии" фестивальдың хедлайнери (Уфа), 2017— Ethnosoy фестиваль (Хельсинки), 2017 – Лахтиге болган фестиваль (Финляндия), 2017 – «Притяжение Таймыра» фестиваль (Дудинка), 2018 – «Путешествие в Рождество» фестиваль (Москва), 2018 – «SIB WORDL MUSIK FEST» фестиваль (Новосибирск), 2018 – «Sziget» фестиваль (Будапешт, Венгрия). 2016 чылдан тура хөй гастрольдарны чоруткан түңнелинде, бо хүнде «HARTYGA» Москва, Петербург, Екатеринбург, Новосибирск, Красноярск, Омск, Уфа, Тверь, Пермь болгаш Россияның өске-даа хоорайларында хөй мөгейикчилериниң чүрээн шагда-ла чаалап апкан.
Сураглыг бөлүктүң кежигүннери: Начын Чөреве (хөөмей, вокал, игил, дошпулуур), Найыс Дулуш (вокал, соктаар хөгжүм), Сергек Сандык (саксофон), Наиль Салчак (гитара), Хүлер Лопсан (бас-гитара).
Бистиң корр.
Чурукту интернеттен алган.
«Шын» №46 2024 чылдың июнь 22
