Кижилерниң эң ынак, четтикпейн манаары чараш байырлал Чаа чыл болгай. Декабрь 31-ге чедир аъш-чемни садып эккеп, соодукчу сыңмас кылдыр чыып, суккаш, ол хүн амданныг чаагай болгаш көрүштүг янзы-бүрү чемни кылып хүнзээр. Дыка-ла чай чок, чымыштыг хүн болуру билдингир. Сөөлгү үеде тускай специалистер кайы чылда столга кандыг чемнер турарын, чүнү салып болбазындан бээр айтып берип турары онзагай. Бис база олардан чыда калбайн, билип алган медээлеривис-биле үлежир-дир бис.
Аът – тодуг-догаа болгаш каас-коя, хоолулуг чемге ынак амытан. Ынчангаш Чаа чыл уткуур стол байлак болур ужурлуг. Ногаа аймаа, үнүштерден болгаш кат-чимистен янзы-бүрү салаттар столду каастаар. Салаттардан аңгыда, ногаалыг, чимистиг аңгы тавактарны албан салыр. Үстүг, чаглыг эът, ылаңгыя аът эъдин, салбас болза эки. Ооң орнунга куш эъди, балык, далай амытаннарындан чемнер турар. Ижер суксуннар чиик болур ужурлуг: компоттар, морс, кисель, үнүштүг шайлар.
Столдуң шывыы кызыл өңнүг болгаш аяк-савага кызыл өңнер турары таарымчалыг. Аът дүрзүлүг каасталга, аът чуруктуг аяктар, тавактар чылдың ээзин өөртүр. Кызыл вазага 3-5 шиви будуун суккаш, кылагар бичии ойнаарактар-биле каастап ап болур.
Чаа чылдың чеми кылдынгыр-ла болзун. Столуңар чараш, элбек болзун.
“Шын” №50 2025 чылдың декабрь 25