Тывада май төнчүзүнден эгелеп техникумнар сургуулдарында профессионал белеткелиниң болгаш арга-дуржулгазының деңнелин көргүскен шылгалдалар эгелээн. «Аныяктар болгаш уруглар» национал төлевилелдиң «Профессионалитет» федералдыг төлевилелиниң чугула хемчээниң бирээзи демо-шылгалда болур. Тестилер эге болгаш профильдиг деңнелдерден тургустунган, олар сорулгалары болгаш утказы-биле ылгалдыг. Ниитизи-биле 2025 чылда республиканың техникумнарының 1489 доозукчулары көргүзүг шылгалдаларын дужаап турар, оларның 30 хире хуузу тускай угланыышкынга боттарын көргүзер.
Бо чылын Тываның политехниктиг техникумун ажылчын мергежилдиг 324 специалист доозуп турар, оларның 288-и көргүзүг шылгалдаларны дужаар. Техникумнуң баазазында көргүзүг шылгалдаларын хүлээп алырынга эптиг бүгү-российжи стандарт ёзугаар дериттинген чеди бүдүрүлге участогун организастаан.
Тываның политехниктиг техникумунуң доозукчулары машина септээр мастер, дааранылга ус-шевери, электри станциялары болгаш системалары, повар, кондитер талазынга боттарының билиглерин, арга-дуржулгазын, билиг-мергежилин көргүзерлер.
«Бистиң сургуулдарывыс автомашина системаларының, агрегаттарының, кезектериниң болгаш механизмнериниң техниктиг байдалын тодаргай хуусаада хынап, дааранылга продукциязын даараарын, септээрин база чаартырын, а поварлар аъш-чемни технологтуг карталарынга дүүштүр белеткеп кылырын көргүзер– деп, колледжтиң директору Айдың Арган-оол чугаалаан. – Келир үениң электриктери ажылдаар черлеринде үрелиишкиннерни тыпкаш, оларны кичээнгей болгаш айыыл чок чоруктуң стандарттарынга дүүштүр чайладыр ужурлуг».
Доозукчуларның мергежилин болгаш арга-дуржулгазынга үнелелди бээри-биле, ажыл берикчилери кирген эксперт комиссиязын тургускан. Тываның техникумнарының бүдүрүлге өөредилгезиниң башкылары болгаш мастерлеринден аңгыда, «БТК-группа» АН, «РБЕ филиал Урал» КХН, «УК ТЭК-4», ТР КУБ ПТО, «РОССЕТИ Сибирь Тываэнерго» АН, «Буян Бадыргы» ресторан, «Фортуна-С» КХН, «Мио-Фуд» КХН, «Сливки» кафе дээш оон-даа өске ажыл берикчилериниң төлээлери эксперт комиссиязынга ажылдаар.
Бистиң корр.
Чурукту ТР-ниң Чазааның парлалга албанындан алган.
“Шын” № 23 2025 чылдың июнь 19
