От олуттуг кызыл Аът чылы ниитизи-биле оожум эртер. Ооң мурнунда салдынган сорулгаларны чедип алырынга кончуг таарымчалыг үе дээрзин астрологтар демдеглеп турар.
Ынчалза-даа чаа 2026 чылда материалдыг таланы кол сорулга кылбазы чугула. Астрологтарның демдеглеп турары-биле алырга, бодун болгаш иштики делегейин сайзырадыр дээш, долгандыр бүгү-ле амылыгларже сагыш салып, делегейге эки чүүлдер кылыр дээш, кызып ажылдап чоруур кижилер эң-не улуг деткимчени алыр.
КОШКАР
Чаа 2026 чыл –Кошкарларга кайгамчык өскерлиишкиннерниң үези. Шагдагы бодалдары боттаныр, дидим-дидим шиитпирлер үндүрер болза, кончуг үре-түңнелдиг болур.
Ынчалза-даа дыка далаш болбайн, бодунуң интуициязынга бүзүреп, бодамчалыг болурун астрологтар сагындырып турар.
2026 чылда оларны мергежилиниң аайы-биле өзеринге эптиг байдалдар манап турар. Ажыл-агыйын солуур азы бодунуң төлевилелин тургузар күзел тыптыр. Хөй-ле Кошкарлар коллегаларындан, эштеринден азы манавааны улустан деткимчени алыр.
Хары угда шуптузунче бардамнай бербейн, план тургузуп алгаш, ол ёзугаар ажылдаарын астрологтар сүмелеп турар.
2026 чыл ылаңгыя күрүне ажылдакчыларынга, IT технологиялар, юриспруденция, өөредилге адырында Кошкарларга кончуг чедиишкинниг болур. Ол ышкаш хенертен келген чарыгдалдардан ойталаар херек. Ооң орнунга акша-хөреңгизин билиглер бедидеринче, чаа билиглер өөренип алырынче, кадыкшылын быжыглаарынче кииргени дээре. От олуттуг кызыл Аът чылы сорулгазын чедип алырынче чүткүлү дээш шаңнаар. Эки кылган чүүлдериниң орнун ол эгидип бээр.
Ниитизи-биле 2026 чылда от олуттуг Аът чылының күжүн бодамчалыг ажыглаарын астрологтар кыйгырып турар. Ол сорулгалар чедип алырынга, бодун эки билип алырынга, күзелдерин бүдүреринге дузалаар.
БУГА
2026 чыл Бугаларга улуг өскерлиишкиннер чылы болур. Астрологтарның баш удур көрүп турары-биле алырга, бо үеде Бугаларга чуртталгада сорулгаларын эде көрүп, ооң үндезинин быжыглап, бодунга чаа-чаа аргаларны ажыдар.
2026 чылда Бугаларга ажылын солуурундан эгелээш, хенертен ажылындан үнеринге чедир манавааны өскерлиишкиннер таваржып болур. Ындыг чүүлдерни чоокка албазын сылдыстар кыйгырып турар. Ол бүгү болуп турар чүүлдер от олуттуг кызыл Аът чылында өзүлдеге ужур-дузалыг болур.
Мөлчүкчүлерге мегеледип болур. Ынчангаш кандыг-даа саналды ыяк хынап алырын кыйгырып турар. Өске талазында бүзүрелдиг аргалар немелде орулганы эккээр.
Тудуг, саң-хөө, көдээ ажыл-агый, дизайн адырларында ажылдап чоруур Бугаларга от олуттуг кызыл Аът чылы чогумчалыг эртер.
2026 чылдың 2 дугаар чартыында салгал дамчыыр өнчү-хөреңги азы саттынган эт-хөреңгиден манавааны акша-хөреңги кирип болур.
2026 чыл Бугалардан ниитизи-биле шыдамык чорукту болгаш корум-чурумнуг болурун негеп турар. Бир эвес оваарымчалыг болгаш шиитпирлиг болуп, бүгү чүвени чурум ёзугаар күүседир болза, Бугаларның туружун быжыглаар болгаш чаа-чаа ажыдыышкыннар болур.
ИЙИСТЕР
2026 чылда Ийистерни кайгамчык өскерлиишкиннер болгаш аргалар манап турар. От олуттуг кызыл Аът чылы амы-хууда болгаш ажыл-агыйының талазы-биле өзүлдени бээр.
2026 чылда Ийистерниң бодалдары күш кирип боттаныр, а сөстери чаа-чаа оруктарже ажыдыышкыннарны кылыптар деңзилиг апаар.
Астрологтарның демдеглеп турары-биле алырга, чыл эгезинде келир үени бодавышаан, чуртталгазын эде көөрүн астрологтар сүмелеп турар. Час келирге, Ийистерге күш кирип, чаа-чаа оруктар ажыттынар. Ажыл-агый талазы-биле саналдар хөйү-биле кээп эгелээр.
Чайын Ийистер ажылының угланыышкынын өскертиксей бээр. Артык чүүлдерден адырлып, чүгле оларга солун чүүлдерни арттырып алыксай бээр.
Күзүн Ийистерге ажыл-агый талазы-биле чаа-чаа оруктар ажыттынар. Оларның тергиидекчи талалары илерээр, ажыл-агый талазы-биле харылзаалары экижип, шагда-ла бодап турган төлевилелдери боттаныр.
Сылдыстарның дамчыдып турары-биле алырга, 2026 чыл Ийистерни саң-хөө талазы-биле өөртүр. Хүлээлгелерин чөптүг күүседири болгаш организастыы көскү түңнелдерни эккээр. Чайын эрги төлевилелдерден азы инвестициялардан манавааны орулга кирип болур. Ниитизи-биле 2026 чыл Ийистерге келир үеде даянгыыш болур бүзүрелдиг курлавырны тургузар.
От олуттуг Аът чылы Ийистерниң хууда чуртталгазынга янзы-бүрү сценарийлерни эккээр. Чааскаанзыргай Ийистерге чылдың бирги чартыында чугаа чедишпейн барып болур. Ол үени ал-бодунуң сайзыралынга тураскаатканы дээре. Чай төнчүзүнде, күс эгезинде романтика манап турар.
(Уланчылыг).
Чыжыргана СААЯ белеткээн.
Чуруктарны интернеттен хоолгалаан.
“Шын” №50 2025 чылдың декабрь 25