От олуттуг кызыл Аът чылы ниитизи-биле оожум эртер. Ооң мурнунда салдынган сорулгаларны чедип алырынга кончуг таарымчалыг үе дээрзин астрологтар демдеглеп турар.
Ынчалза-даа чаа 2026 чылда материалдыг таланы кол сорулга кылбазы чугула. Астрологтарның демдеглеп турары-биле алырга, бодун болгаш иштики делегейин сайзырадыр дээш, долгандыр бүгү-ле амылыгларже сагыш салып, делегейге эки чүүлдер кылыр дээш, кызып ажылдап чоруур кижилер эң-не улуг деткимчени алыр.
РАК (22.06 – 23.07)
2026 чыл Рактарга сагыш-сеткил талазы-биле амыдыралда улуг өскерлиишкиннер үези.
Рактар от олуттуг Аът чылында күчү-күжү көвүдеп, амыдыралда бурунгаарлаар аргалыг болур. Шагдагы күзелдери боттаныр.
Мергежилиниң аайы-биле чаа оруктар ажыттынар. Чамдык Рактарга ажыл солууру, чаа мергежил шиңгээдип алыры азы бодунуң төлевилелин боттандырар дээн ышкаш өскерлиишкиннер берге болур. Өскелери сорулгазын таптыг салып алгаш, ооң ужур-уткалыын көргүзүптер болза, деткимче ап болур.
Хары угда шупту ажылды кылырын оралдашпайн, чаңгыс үзел-бодалдыг кижилерге даянып, бичиилеп шимченгени дээре. Кижилер дээш сагыш човаашкын, чогаадыкчы чорук, психология азы шимчевес өнчү-хөреңги талазы-биле чедимчелиг болур.
Саң-хөө талазы-биле байдал доктаамал эвес болур. Бир талазында үнер чылдың ээзи хөй акша-шалыңныг ажыл азы ажыктыг эштежилге дээн ышкаш манавааны аргалар эккээр.
Өске талазында хенертен келир чарыгдалдар турар. Ынчан бюджедин таптыг планнап алыр болза эки.
2026 чылдың ийиги чартыында улуг түңнүг акша кирер. Ону түр үениң күзелдеринче эвес, а үр үениң сорулгаларынче кииргени дээре.
Ниитизи-биле 2026 чыл Рактарга коргуушкундан болгаш эрги чаңчылдардан адырлыр үе. От олуттуг Аът ооң ёзулуг күзелдерин билип алыр дээш, нарын байдалдарны тургузуп болур. Бодун эки билип алыры-биле, демдеглелдер бижиир болза эки.
АРЗЫЛАҢ (24.07 – 23.08)
2026 чыл Арзылаңнарга өскерилгелерниң болгаш чаа аргаларның чылы. Эң-не дидим бодалдар боттандырар күштү олар алыр.
Астрологтарның демдеглеп турары-биле 2026 чылда Арзылаңнарның чыглып келген күчү-күжү бүрүнү-биле ажыттынар. Ынчалза-даа чүгле кол сорулгаларже сагыш салып, улуг күзелдер биле харыысалганы деңге тудуп өөренир.
Арзылаңнарны мергежилиниң талазы-биле канчаар-даа аажок кедилиг чүүлдер манап турар. Үнер чылда тергиидээр, үнелел алыр азы шагда бодап чораан төлевилелин чуртталгаже киирер аргалыг болур.
Арзылаңнарның идепкейлиг болгаш чогаадыкчы чоруу бүзүрелдиг талалакчылары апаар ат-алдарлыг кижилерни хаара тудуптар. 2026 чылдың ылаңгыя ийиги чартыы кончуг таарымчалыг болур. Ол хөй чон баарынга сөс ап, чугаалажыышкыннар кылырынга тааржыр.
Күчү-күжүн тоо-быдаргай чашканнавайн, бир-ийи сорулгаже улуг күш үндүрер болза эки. 2026 чылдың эгезинде саң-хөө талазы-биле бергедээшкиннерге таварышпас дээш, бюджедин таптыг планнап алыры чугула.Чылдың ийиги чартыында акша-хөреңги талазы-биле байдал экижип кээр, орулгазы өзүп эгелээр. Ниитизи-биле от олуттуг Аът Арзылаңнарга чуртталганың шупту адырларынга чаа деңнелче үнер арганы бээр.
КЫСЧЫГАШ (24.08 – 22.09)
2026 чыл Кысчыгаштарның ажыл-агыйынга, ылаңгыя күрүнеде ажылдап турарларга, дүжүткүр, көскү чедиишкиннерлиг чыл болур. Депшилгени, ажылын солуурун азы акша-шалыңы көвүдээрин сылдыстар баш удур чугаалап турар.
Ынчалза-даа саң-хөө айтырыгларынга оваарымчалыг болурун астрологтар кыйгырып турар. Чигзинчиг инвестициялардан болгаш өскелерниң хүлээлгелеринден оваарнып чоруур херек. Май, ноябрь айлар эң-не нарын, берге болур.
Ниитизи-биле 2026 чыл Кысчыгаштарга интуициязын сайзырадырын сүмелеп турар. Иштики сагыш-сеткилин сайзырадырда, философия биле психологияны өөренир болза эки. Шагда-ла бодап чораан айтырыгларынга харыылар тыварынга болгаш бодун эки билип алырынга ол дузалаар.
2026 чылда эң-не кол кичээл – өскерлиишкиннерни хүлээп өөренири чугула. Эрги чүүлдү салып өөренирин сылдыстар кыйгырып турар. Ооң орнунга чаа чүүлдер албан келир.
(Уланчылыг)
Чыжыргана СААЯ белеткээн.
Чуруктарны интернеттен хоолгалаан.
"Шын" №50 2025 чылдың декабрь 25