От олуттуг кызыл Аът чылы ниитизи-биле оожум эртер. Ооң мурнунда салдынган сорулгаларны чедип алырынга кончуг таарымчалыг үе дээрзин астрологтар демдеглеп турар.
Ынчалза-даа чаа 2026 чылда материалдыг таланы кол сорулга кылбазы чугула. Астрологтарның демдеглеп турары-биле алырга, бодун болгаш иштики делегейин сайзырадыр дээш, долгандыр бүгү-ле амылыгларже сагыш салып, делегейге эки чүүлдер кылыр дээш, кызып ажылдап чоруур кижилер эң-не улуг деткимчени алыр.
ДЕҢЗИЛЕР (23.09 – 22.10)
Деңзилерге бурунгаарлаарынга эки үе. Ынчалза-даа от олуттуг кызыл Аът чылы олардан шиитпирлиг болурун негеп турар. 2026 чылда Деңзилер чаңчылчаан байдалындан уштунгаш, эң-не дидим базымнарны кылыр апаар.
Ажыл-агый талазынга бодунуң интуициязынга даянып, дүрген шиитпирлерни үндүрүп өөренир херек. Ниитизи-биле 2026 чыл кады ажылдаар чаа эштер тыварынга, инвесторлар дилээринге болгаш келир үеде ажыктыг төлевилелдер ажылдап кылырынга ажыктыг болур. Делегей чергелиг саарылгаже үнер азы ажылынга үнелел алыры мыяда.
2026 чылда саң-хөө талазы-биле байдал доктаамал эвес болур. Орулга улгадыр-даа болза, чайганып турар болур. Август болгаш декабрь айларда Деңзилерге эң-не дүжүткүр, а март биле ноябрьда чарыгдалдар элээн хөй болур.
Ниитизи-биле сылдыстар чаңчылчаан байдалындан уштунарындан кортпазын кыйгырып турар. Ынчан от олуттуг кызыл Аът чылы Деңзилерге хөй-хөй аргаларны ажыдар.
ЭЭРЕМЧИК (23.10 – 22.11)
2026 чылда Ээремчиктерни иштики, даштыкы өскерлиишкиннер манап турар. Февраль, май, октябрь айларда Ээремчиктерге салым-чолун шиитпирлээринге чогумчалыг болурун астрологтар демдеглээн.
Ажыл-агый талазынга көскү чедиишкиннер келир. От олуттуг кызыл Аът чылында билиглерин бедидеринге, чаа чүүлдер өөренип алырынга таарымчалыг. Ынчалза-даа Ээремчиктер үр үеде боттандырар сорулгалар дугайында бодап, оочур ёзугаар оларны боттандырары чугула дээрзин сылдыстар сагындырып турар.
2026 чылда Ээремчиктер саң-хөө талазы-биле быжыгып келир. Күзүн база чыл төнчүзүнде хөй түңнүг акша-хөреңгини манап болур. Ол ышкаш кайы хамаанчок чарыгдалдардан ойталааш, орулгазын кончуг таптыг аайлап алырын сүмелеп турар. Ынчангаш сылдыстар далаш садыглажылга болгаш чигзинчиг саналдардан ойталаарын кыйгырган.
АДЫГЖЫ (23.11 – 21.12)
Сөөлгү 10 чылдың аразында Адыгжыларны эң-не сорук киирер чыл 2026 чыл болур. От олуттуг кызыл Аът чылында оларның күзелдери бүдер. Ынчалза-даа эргиде чаңчылдарындан уштунуп, сорулгазының аайы-биле шимченир апаар дээрзин сылдыстар демдеглеп турар.
Ажыл-агыйының талазынга чаа аргалар ажыттынар. Дидим Адыгжылар чурттап чоруур черин, ажылын азы статузун солуур аргалыг болур. Сылдыстарның көргүзүп турары-биле, эң-не улуг чедиишкиннерни медиа, өөредилге, туризм адырларында ажылдап чоруур Адыгжылар чедип алыр.
Саң-хөө талазы-биле кончуг эки болур. Аргажок улуг күш үндүрүп тургаш, улуг орулга ап болурун астрологтар демдеглеп турар. Адааннажылга үезинде бодамчалыг болган кижилерни от олуттуг Аът шаңнаар.
Ниитизи-биле 2026 чылда Адыгжылар күзелдерин сайгарып көргеш, кайнаар күжүн болгаш курлавырларын киирерин эки боданып алырын сылдыстар тайылбырлап турар.
Чыжыргана СААЯ белеткээн.
Чуруктарны интернеттен хоолгалаан.
"Шын" №50 2025 чылдың декабрь 25