Тыва культураның төөгүзүнде болуп көрбээн солун болуушкун бо чылын декабрь 11-де Санкт-Петербург хоорайга болган.
Чүл дээрге, К.Б. Ондар аттыг Тыва үндезин культура төвүнден Тываның улустуң хөөмейжилери, ТР-ниң алдарлыг артистери Игорь Көшкендей, Андрей Монгуш база “Тыва” улустуң аас чогаал ансамблиниң удуртукчузу, Тываның улустуң хөөмейжизи Артур Дамдын-оол болгаш аныяк-даа болза, хөй санныг мөөрейлерниң тиилекчизи, хөөмейжи Далай Дамдын “Тоолдар балы” деп балет артистериниң шиизинге киржир аас-кежиктиг болганнар.
Олар делегей төөгүзүнде ады алдаржаан полководчуга тураскааткан “Сүбедей” деп эң баштайгы тыва национал балетке киришкеннер. Ооң кол ролюн делегей чергелиг балет артизи, РФ-тиң улустуң артизи Фарух Рузиматов ойнап күүседип турар. Сураглыг балет артизи “Тыным алган аъдым” деп чонга билдингир апарган композицияга үдеткен партияны ойнаан. Ол тыва композицияның автору – ТР-ниң алдарлыг артизи, Тываның улустуң хөөмейжизи, “Тыва чоннуң чоргааралы” бедик аттың эдилекчизи, композитор Андрей Монгуш дээрзин сагындыраал. Ол-ла төөгүлүг болуушкун сураглыг тыва хөөмейжиниң төрүттүнген хүнүнде болганы солун.
Шак ындыг бүгү-россия чергелиг сценага Тываның культуразын төлептиг бараалгаткан хөйге билдингир, ховар салым-чаяанныг хөөмейжи артистерге чоргаарланмас аргажок. Моон-даа соңгаар чогаадыкчы ажыл-ижинге чедиишкиннерни коллегалары болгаш хөй санныг көрүкчүлери, мөгейикчилери күзээн.
Чурукту ТР-ниң Культура яамызының социал четкиде арнындан алган.
“Шын” №50 2025 чылдың декабрь 25
