Ноябрь 17–19 хүннеринде Моол күрүнениң төвү Улан-Батор хоорайның Багануур районунга тыва чонга ады билдингир, Моол күрүнениң Чаан мөгези, хостуг хүрешке делегей чергелиг спорт мастери, Алдартан аттыг национал клубтуң үндезилекчизи Дамиран Бумбаярның адынга тураскааткан бичии болгаш элээди оолдар аразынга национал хүрешке Моолдуң бирги чери дээш улуг маргылдаазы болуп эрткен.
Моолдуң бирги чери дээш хүреш маргылдаазы Д. Бумбаяр Чаанның тургусканы “Алдартан” клубтуң 20 чыл оюнга тураскаатканын дакпыр демдеглээн. Хүреш маргылдаазы долгандырыг хевирге 6 хардан 16 хар чедир 5 аңгы бөлүкке 1000 хире шилиндек бичии мөгелер күжүн шенеп киришкеннер. Бо маргылдаага даштыкы аалчы-мөгелер кылдыр Тывадан 60 ажыг бичии мөгелер чедиишкинниг киришкен. Аңаа бистиң республикадан тыва хүреш талазы-биле “Алдар” спортчу клувунуң тренер башкылары Эрес Кара-Сал, Ширижик Түметей, Онзагай Ооржак баштаан 28 бичии мөгелер “Алдар” клувун төлээлеп киришкеннер.
Эң-не бичии бөлүктүң 6–7 хар чедир мөгелер аразынга “Алдар” хүреш школазының мөгези, “Тыва Республиканың чаш Арзылаңы” Рамзан Монгуш чараш аргаларны көргүзүп, онагларын чииги-биле октагылааш, 70 ажыг бичии мөгелер аразынга “Моолдуң чемпиону” атты чаалап алган.
Эң хөй киржикчилиг бөлүкке 14–15 хар чедир бөлүкке 180 мөге ачыр-дачыр тудушканнар. Тываның адын төлээлеп, Күчүтен мөгевис Эрес Кара-Салдың оглу, “Алдар” хүреш школазының мөгези Чамыяң Кара-Сал бодунуң бөлүүнге 37 онаан октааш, аваангыр чараш хүрежин көргүзүп шүүлген.
Ийиги шаңналдыг черге 8–9 харлыг бөлүкке 140 мөгениң хүрежинге “Алдар” клувунуң мөгези Күдер Ховалыг төлептиг болган. Үшкү шаңналдыг черни 10–11 харлыг бөлүкке 100 ажыг мөгениң хүрежинге “Алдар” клувунуң мөгези (Сүт-Хөл кожууннуң Ишкин сумузу чурттуг) Арбай Сат чараш бүзүрелдиг хүрежин көргүзүп, хүлер медальга төлептиг болган. Ол ышкаш 12–13 харлыг бөлүкке 100 ажыг мөгелерниң хүрежинге “Алдар” клувунуң мөгези Ай-Белек Хертек 3-кү черни, хүлер медальды чаалап алган.
Моолдуң бирги чери дээш национал хүрешке чедиишкинниг киришкеш келген бичии болгаш элээди мөгелеривиске, оларның тренер башкыларынга база ада-иелеринге тыва чоннуң өмүнээзинден изиг байырны чедирип тур бис.
А.ЧАМБАЛ-ООЛ, спорттуң оочуну.
“Шын” №91 2024 чылдың ноябрь 27
