Февраль 27-де Тывага Россияның төөгүлүг ниитилелиниң удуртулгазының даргазы, “Ада-чурттуң төөгүзү” фондунуң директору Руслан Гагкуевтиң киржилгези-биле ниитилелдиң регионалдыг салбырын бадылаан. Ол Тываның ССРЭ-ге каттышканындан бээр 80 чыл болган үезинде эгелээн.
Российжи төөгү ниитилелиниң ажылы төөгүлүг сактыышкынны камгалаарынче, төөгүнү өөренир болгаш чырыдарынга үндезилээн культураны тургузарынче угланган. Чугула ажыл эрткен үени эде бижиир болгаш өскертир доктаамал оралдажыышкыннар болур.
Салбырның даргазынга төөгү эртемнериниң кандидады, ТГШИ-ниң директору Вячеслав Март-оолду томуйлаан. Чаа адырга Совет Эвилелинге республиканың каттышканындан бээр 80 чылынга тураскааткан хемчеглерни, делегей чергелиг эртем-практиктиг конференцияны белеткээринге болгаш эрттиреринге, Тываның төөгүзүнүң өөредилге номун доозарынга дузалажырынга идепкейлиг киржирин санап турар.
Бистиң корр.
“Шын” №15 2024 чылдың февраль 28
